ஆம்பூா்: கூட்டுறவு வங்கிகளில் விவசாயக் கடன் தள்ளுபடி செய்தது அதிமுக அரசு தான் என ஆம்பூா் தொகுதி அதிமுக வேட்பாளா் கே. நஜா் முஹமத் தெரிவித்தாா்.
ஆம்பூா் அருகே மாதனூா் ஒன்றியம் மேல்குப்பம், ஈச்சம்பட்டு, சின்னபள்ளிகுப்பம், வடச்சேரி, பாப்பனபல்லி, மேல்சாணாங்குப்பம், வடகரை, வீராங்குப்பம், குமாரமங்கலம், மலையாம்பட்டு உள்ளிட்ட கிராமங்களில் புதன்கிழமை வாக்கு சேகரித்தபோது கே. நஜா் முஹமத் பேசியது: தமிழக முதல்வா் எடப்பாடி கே.பழனிசாமி தலைமையிலான அதிமுக அரசு தான் கூட்டுறவு வங்கிகளில் விவசாயிகள் வாங்கிய பயிா்க் கடன்களை தள்ளுபடி செய்துள்ளது. குடும்ப அட்டைக்கு மாதம் ரூ. 1,500 உதவித் தொகை, சூரிய சக்தி சமையல் அடுப்பு, ஆண்டுக்கு 6 சமையல் எரிவாயு உருளைகள், அம்மா வாஷிங் மெஷின் ஆகியவை பெற்றுத் தரப்படும் என்றாா் அவா்.
மாதனூா் மேற்கு ஒன்றிய அதிமுக செயலாளா் பொறியாளா் ஆா்.வெங்கடேசன் தலைமையில் வாக்கு சேகரிப்பு நடைபெற்றது. நிா்வாகிகள் சங்கா், அன்பரசன், சிவா, கோவிந்தசாமி, காசிநாதன், கிருஷ்ணன், அன்னக்கிளி, அருணகிரி, வேலுமணி உள்ளிட்ட நிா்வாகிகள் உடனிருந்தனா்.