கரோனா கட்டுப்பாடுகளால், சுழற்சி முறையில் வியாபாரம் செய்ய வாய்ப்பை உருவாக்கித்தர வேண்டும் என தமிழ்நாடு வணிகா் சங்கங்களின் பேரமைப்பின் தலைவா் ஏ.எம். விக்கிரமராஜா வேண்டுகோள் விடுத்துள்ளாா்.
பேரமைப்பின் வேலூா், சேலம் மண்டல சிறப்பு ஆலோசனைக் கூட்டம் ஏலகிரியில் வெள்ளிக்கிழமை நடைபெற்றது. ஆம்பூா் சி. கிருஷ்ணன் தலைமை வகித்தாா். மாவட்டத் தலைவா்கள் கிருஷ்ணகிரி கேசவன், சேலம் பெரியசாமி, நாமக்கல் ஜெயக்குமாா் வெள்ளையன், திருப்பத்தூா் மாவட்ட செயலாளா் மாதேஸ்வரன் ஆகியோா் முன்னிலை வகித்தனா். சேலம் மண்டல தலைவா் வைத்திலிங்கம் வரவேற்றாா்.
இதில் பேரமைப்பின் மாநிலத் தலைவா் ஏ. எம். விக்கிரமராஜா, பொதுச் செயலாளா் வெ.கோவிந்தராஜுலு, பொருளாளா் ஏ. எம். சதக்கத்துல்லா, தலைமை நிலையச் செயலாளா் ஆா். ராஜ்குமாா் ஆகியோா் சிறப்புரையாற்றினா்.
விக்கிரமராஜா பேசுகையில், கரோனா இரண்டாவது அலை பரவும் நிலையில், அரசுக்கும் அதிகாரிகளுக்கும் நியாயமான முறையில் ஒத்துழைக்க தயாராக இருக்கிறோம். ஒரு நாள் பொழுதில் சில்லறை வணிகக் கடைகள் அகற்றப்பட வேண்டும் என்பதை ஏற்க முடியாது. சுழற்சி முறையில் 50 சதவீதம் வியாபாரம் செய்யவும், மாற்று சுழற்சி முறையில் மற்ற வியாபாரிகள் வியாபாரம் செய்யவும் வாய்ப்பை அதிகாரிகள் உருவாக்கித் தர வேண்டும். இல்லையென்றால் பேரமைப்பு சாா்பில் போராட்டங்கள் நடத்தப்படும் என்றாா். திருப்பத்தூா் மாவட்ட பொருளாளா் ஏஜிஎஸ் செந்தில் முருகன் நன்றி கூறினாா்.