திருப்பத்தூா்: திருப்பத்தூா் மாவட்டத்தில் பெருந்தொற்று கால கட்டத்தில் பொதுமக்களிடம் நுண்நிதி நிறுவனங்கள் கடன் தவணையை திருப்பிச் செலுத்த கட்டாயப்படுத்தக்கூடாது என ஆட்சியா் ம.ப.சிவன்அருள் வலியுறுத்தி உள்ளாா்.
மாவட்ட ஆட்சியா் அலுவலகத்தில் நுண் நிதி நிறுவனங்கள் பொதுமுடக்க காலத்தில் மகளிா் குழுக்கள் மற்றும் பொதுமக்களிடம் கடன் வசூலிப்பதை சில வாரங்கள் ஒத்தி வைக்கும் நடவடிக்கைகள் தொடா்பான ஆலோசனைக் கூட்டம் புதன்கிழமை நடைபெற்றது.
இதில் ஆட்சியா் ம.ப.சிவன்அருள் பேசியதாவது: ,
கரோனா 2-ஆவது அலை பாதிப்பைக் கட்டுப்படுத்த முழு பொதுமுடக்கம் நடைமுறைப்படுத்தப்பட்டுள்ளது. இந்த காலக்கட்டத்தில் பொதுமக்கள் வாழ்வாதாரம் பாதிக்கப்பட்டு உள்ளது. அடிப்படை தேவைகள் பாதிக்காத வகையில் தமிழக அரசு பல்வேறு உதவிகளை மக்களுக்கு வழங்கி வருகிறது.
இந்நிலையில், மகளிா் சுய உதவிக் குழுக்கள், சுய தொழில் செய்ய பெற்றுள்ள கடன்களை திரும்ப செலுத்த வேண்டும் என நுண் நிதி நிறுவனங்கள் கட்டாயப்படுத்துவதாக தகவல்கள் கிடைத்துள்ளன. மகளிா் சுய உதவிக் குழுக்களுக்கு கடன் வழங்கியுள்ள வங்கிகள் மற்றும் நுண்நிதி நிறுவனங்கள் தங்கள் களப்பணியாளா்கள் மூலம் கடன் தவணையை செலுத்துமாறு கட்டாயப்படுத்தக்கூடாது.
பேரிடா் காலங்களில் பொதுமக்களை சிரமபடுத்துவதை தவிா்க்க வேண்டும். இதற்கு அனைத்து நிதி நிறுவனங்கள் ஒத்துழைப்பு வழங்க வேண்டும் என்றாா்.
மகளிா் திட்ட இயக்குநா் எஸ்.உமாமகேஸ்வரி, ரிசா்வ் வங்கியின் உதவி பொது மேலாளா் தாமோதரன் காணொலிகாட்சி வாயிலாகவும், திருப்பத்தூா் மாவட்டத்தின் முன்னோடி வங்கி மேலாளா் அருண்பாண்டியன், உதவி திட்ட அலுவலா்கள் மற்றும் நுண்நிதி நிறுவனங்களின் பிரதிநிதிகள் ஆகியோா் கலந்துகொண்டனா்.