பொது இடங்களில் முகக் கவசம், சமூக இடைவெளியைப் பின்பற்றுவது அவசியம்

காய்கறி சந்தை உள்ளிட்ட பொதுஇடங்களில் கரோனா நோய்த் தொற்றை தவிா்க்கும் வகையில் முகக் கவசம், சமூக இடைவெளியை பொதுமக்கள் அனைவரும் பின்பற்றுவதோடு, கவனமாகவும் நடந்து கொள்ள வேண்டும் என ஆட்சியா் ஆல்பி ஜான் வா்கீஸ் தெரிவித்தாா்.

திருவள்ளுா் பேருந்து நிலையம், பஜாா் வீதியிலும் பொதுமக்கள் முகக்கவசங்கள் அணிவது, சமூக இடைவெளியைப் பின்பற்றுகிறாா்களா என ஆட்சியா் ஆல்பி ஜான் வா்கீஸ் திங்கள்கிழமை ஆய்வு செய்தாா். அப்போது, பொதுமக்கள் நெருக்கமாக நிற்காமல் சமூக இடைவெளியுடன் நிற்கவும், முகக் கவசம் அணிந்திருக்கவும் வலியுறுத்தியதோடு, இல்லாதோருக்கு முகக்கவசங்களையும் வழங்கி காய்கறி சந்தையில் கடை வைத்துள்ளோா் அனைவரும் கட்டாயம் தடுப்பூசி போடவும் அறிவுரை வழங்கினாா்.

இதுகுறித்து செய்தியாளா்களிடம் அவா் கூறியாதவது. அரசு வழிகாட்டு நெறிமுறைகளின்படி தமிழகத்தில் உள்ள மாவட்டங்களை மூன்று வகைகளாக பிரித்து, ஒவ்வொரு மாவட்டத்திற்கும் கரோனா தொற்று பரவலுக்கு ஏற்றவாறு தளா்வுகளை அறிவித்துள்ளது. இதில் இயல்பு நிலைக்கு திரும்பும் விதமாக பல்வேறு அறிவிப்புகள் வெளியிடப்பட்டுள்ளது. பொதுமக்கள் இத்தளா்வுகள் அனைத்தும் கவனமாக பயன்படுத்தி கொள்வது அவசியம். இந்த மாவட்டத்தில் 1,800 ஆக இருந்த தொற்றின் பாதிப்பு தற்போது 202 ஆக குறைந்துள்ளது என்றாா்.