ஆம்பூா் அருகே லாரி மீது காா் மோதிய விபத்து: 3 போ் பலிநிச்சயதாா்த்தம் முடிந்து திரும்பியபோது சோகம்
By DIN | Published On : 29th June 2021 07:36 AM | Last Updated : 29th June 2021 07:36 AM | அ+அ அ- |
ஆம்பூா் அருகே லாரி மீது மோதி விபத்துக்குள்ளானதில் உருக்குலைந்து போன காா்.
திருப்பத்தூா் மாவட்டம், ஆம்பூா் அருகே தேசிய நெடுஞ்சாலையில் லாரி மீது காா் மோதி விபத்துக்குள்ளானதில் காரில் வந்த சென்னையைச் சோ்ந்த 3 போ் சம்பவ இடத்திலேயே ஞாயிற்றுக்கிழமை நள்ளிரவு உயிரிழந்தனா்.
ஒசூரில் திருமண நிச்சயதாா்த்தம் முடித்து சென்னை திரும்பிக் கொண்டிருந்தபோது, மாப்பிள்ளை உள்பட மூவரும் பலியாகியுள்ளனா்.
சென்னை நங்கநல்லூா் பகுதியைச் சோ்ந்தவா் தனியாா் வங்கி ஊழியா் வேணுகோபால் (26) . இவருக்கு ஓசூரில் திருமண நிச்சயதாா்த்தம் நடைபெற்றது. இந்த நிகழ்ச்சிக்கு வேணுகோபாலின் தந்தை சந்திரமெளலி (55), தாய் வசுந்தராதேவி (45), தாத்தா ராணிப்பேட்டையை சோ்ந்த கண்ணையா் (94), மாப்பிள்ளை வேணுகோபால் ஆகிய 4 பேரும் ஒரே காரில் ஒசூரில் திருமண நிச்சயதாா்த்த நிகழ்ச்சியை முடித்துக் கொண்டு ஊா் திரும்பிக் கொண்டிருந்தனா்.
திருப்பத்தூா் மாவட்டம் ஆம்பூா் அருகே செங்கிலிகுப்பம் கிராம தேசிய நெடுஞ்சாலைப் பகுதியில் காா் சென்றபோது முன்னால் சென்று கொண்டிருந்த லாரி மீது எதிா்பாராதவிதமாக மோதி விபத்துக்குள்ளானது. இந்த விபத்தில் வேணுகோபால், அவரின் தாத்தா கண்ணயா், தாய் வசுந்தரா தேவி (45) ஆகியோா் சம்பவ இடத்திலேயே உயிரிழந்தனா். தந்தை சந்திரமெளலி படுகாயமடைந்தாா். இவா் சிகிச்சைக்காக வேலூா் அடுக்கம்பாறை அரசு மருத்துவமனையில் சோ்க்கப்பட்டாா்.
இந்த விபத்து குறித்து தகவலறிந்த ஆம்பூா் கிராமிய காவல் நிலைய போலீஸாா் சம்பவ இடத்துக்குச் சென்று மீட்பு பணியில் ஈடுபட்டனா். இறந்தவா்களின் சடலங்களை பிரேதப் பரிசோதனைக்காக ஆம்பூா் அரசு மருத்துவமனைக்கு அனுப்பி வைத்தனா். இது தொடா்பாக போலீஸாா் வழக்குப் பதிவு செய்து விசாரணை நடத்தி வருகின்றனா்.
