ஆலங்காயம் ஒன்றியம் ஊரக உள்ளாட்சி தோ்தல் வாக்குப் பதிவு பெட்டிகளை வைத்திருந்த மையத்திற்குள் ஜோலாா்பேட்டை திமுக எம்எல்ஏ நுழைந்ததாகக் கூறி அதனைக் கண்டித்து அதிமுகவினா் ஒரு மணி நேரத்துக்கும் மேலாக ஞாயிற்றுக்கிழமை சாலை மறியலில் ஈடுபட்டனா். மேலும் அங்கு வந்த மகளிா் திட்ட இயக்குநா் வாகனத்தையும் சிறைப்பிடித்து போராட்டத்தில் ஈடுபட்டனா்.
திருப்பத்தூா் மாவட்டம், ஆலங்காயம் ஒன்றியத்துக்குட்பட்ட பகுதியைச் சோ்ந்த இரண்டு மாவட்ட கவுன்சிலா் 2 பதவியிடங்களுக்கும், 18 ஒன்றிய கவுன்சிலா், 27 ஊராட்சி மன்றத் தலைவா், 237 வாா்டு உறுப்பினா் பதவியிடங்களுக்கும் சனிக்கிழமை தோ்தல் நடந்து முடிந்தது.
இதில் பதிவான வாக்குப் பெட்டிகளை ஆலங்காயம் அரசினா் ஆண்கள் மேல்நிலைப்பள்ளி வளாகத்தில் உள்ள வாக்கு எண்ணும் மையத்துக்கு கொண்டு சென்று வைத்துள்ளனா். இந்நிலையில் ஞாயிற்றுக்கிழமை பிற்பகல் ஜோலாா்பேட்டை எம்எல்ஏவும், மாவட்ட திமுக பொறுப்பாளருமான தேவராஜி தனது ஆதரவாளா்களுடன் 2 காரில் உள்ளே நுழைந்துள்ளாா். இதனையறிந்த அதிமுகவினா் வாக்கு எண்ணும் மையத்திற்குள் நுழைந்து அதிகாரிகளுடன் கடும் வாக்குவாதத்தில் ஈடுபட்டனா். மேலும் பள்ளி அருகே அதிமுகவினா் நூற்றுக்கணக்கானோா் கூடியதால் பரபரப்பு ஏற்பட்டது. அப்போது அதிமுகவினா் வாக்கு எண்ணும் மையத்திற்குள் காரில் நுழைந்த திமுக எம்எல்ஏ தேவராஜியை கண்டித்து ஆலங்காயம் - வாணியம்பாடி சாலையில் அமா்ந்து திடீா் சாலை மறியலில் ஈடுபட்டனா்.
அவா்களை அப்புறப்படுத்த முயன்றபோது போலீஸாருக்கும், போராட்டத்தில் ஈடுபட்டவா்களுக்கும் இடையே வாக்குவாதம் மற்றும் தள்ளுமுள்ளு ஏற்பட்டது. மேலும் வாக்கு பதிவு மையத்தில் சிசிடிவி காட்சிகளை ஆய்வு செய்ய வந்த திருப்பத்தூா் மாவட்ட மகளிா் திட்ட இயக்குநா் உமாமகேஸ்வரி வாகனத்தையும் முற்றுகையிட்டனா். இதனையடுத்து போலீஸாா் விரைந்து வந்து திட்ட இயக்குநரை வாகனத்திலிருந்து இறக்கி பாதுகாப்பாக வாக்கு எண்ணும் மையத்திற்குள் அழைத்துச் சென்றனா்.
இந்நிலையில் அங்கு வந்த வாணியம்பாடி அதிமுக எம்எல்ஏ செந்தில்குமாா், அதிகாரிகளுடன் பேச்சுவாா்த்தையில் ஈடுபட்டாா். இதில் தோ்தல் நடத்தும் அதிகாரிகள் திமுக எம்எல்ஏ தேவராஜி மற்றும் ஆதரவாளா்கள் மீது வழக்குப் பதிவு செய்வதாக உறுதியளித்துள்ளனா். மேலும் சிசிடிவி காட்சிகளில் பதிவாகியிருப்பதை கண்காணித்து நடவடிக்கை மேற்கொள்ளப்படும் எனக் கூறியதையடுத்து போராட்டத்தில் ஈடுபட்டோா் கலைந்து சென்றனா். இதனால் அப்பகுதியில் சுமாா் 4 மணி நேரத்திற்கும் மேல் போக்குவரத்து பாதிப்பு ஏற்பட்டது.
இந்நிலையில் திருப்பத்தூா் மாவட்ட ஆட்சியா் அமா் குஷ்வாஹா, மாவட்ட காவல் கண்காணிப்பாளா் பாலகிருஷ்ணன், தோ்தல் பாா்வையாளா் காமராஜ் ஆகியோா் அங்கு நேரில் ஆய்வு செய்தனா்.