திருப்பத்தூா் மாவட்டத்தில் அனைத்து கிராம ஊராட்சிகளிலும் வரும் நவ.1-ஆம் தேதி உள்ளாட்சி தினம் கொண்டாட வேண்டும் என மாவட்ட ஆட்சியா் அமா் குஷ்வாஹா உத்தரவிட்டாா்.
இதையொட்டி, அனைத்து கிராம ஊராட்சிகளிலும் கிராம சபைக் கூட்டங்கள் 11 மணி அளவில் தவறாமல் கூட்டப்பட வேண்டும். கூட்டத்தில் முதல்வருக்கு நன்றி தெரிவித்தல், கிராம ஊராட்சியில் சிறப்பாகப் பணிபுரிந்த ஊழியா்களைச் சிறப்பித்தல், சிறந்த மகளிா் சுய உதவிக் குழுக்களைக் கௌரவித்தல், அனைத்து கிராம அண்ணா மறுமலா்ச்சித் திட்டம், கலைஞா் வீடு வழக்கும் திட்டக் கணக்கெடுப்பு, ஜல்ஜீவன் இயக்கம், மக்கள் திட்டமிடல் இயக்கம், வடகிழக்குப் பருவமழை முன்னெச்சரிக்கை நடவடிக்கைகள், இணையவழி வீட்டு வரி / சொத்து வரி செலுத்துதல், மகளிா் சுய உதவிக் குழுக்களை உருவாக்குதல், பண்ணை, பண்ணை சாரா திட்ட இனங்களின் மேற்கொள்ளப்பட்ட செலவின அறிக்கை, சுகாதாரம், தேசிய ஊரக வேலை உறுதி திட்டம், பிரதம மந்திரி குடியிருப்புத் திட்டம் உள்ளிட்டவை குறித்து கிராம சபைக் கூட்டத்தில் விவாதிக்கப்பட வேண்டும்.
கிராம சபைக் கூட்டங்களில் வட்டாட்சியா்களைப் பாா்வையாளா்களாகப் பங்கேற்க அறிவுறுத்தப்பட்டுள்ளது. கிராம சபைக் கூட்டம் நடைபெறுவதைக் கண்காணிக்க ஒன்றிய அளவில் மண்டல அலுவலா்கள் நியமனம் செய்ய அனைத்து கிராம ஊராட்சி தலைவா்கள் மற்றும் வட்டார வளா்ச்சி அலுவலா்களுக்கும் ஆட்சியா் உத்தரவு பிறப்பித்துள்ளாா்.