ரூ.26 லட்சத்தில் தாா் சாலைப் பணி: எம்எல்ஏ தொடங்கி வைத்தாா்

வாணியம்பாடி: ஜோலாா்பேட்டை ஒன்றியத்துக்குட்பட்ட வேட்டப்பட்டு ஊராட்சி, மூக்கனூரான்வட்டம், ராசன் வட்டம் ஆகிய பகுதியில் ரூ.26 லட்சத்தில் புதிய தாா் சாலைப் பணிகளை எம்எல்ஏ க. தேவராஜி தொடங்கி வைத்தாா்.

கடந்த 15 ஆண்டுகளுக்கு முன்பு போடப்பட்ட இச்சாலை பல இடங்களில் பழுதடைந்து குண்டும் குழியுமாக இருந்து வந்தது. இதனால் அவ்வழியாக சென்று வரும் பொதுமக்கள், வாகன ஓட்டிகள் கடும் அவதிக்குள்ளாகி வந்தனா். இதையடுத்து தொகுதி எம்எல்ஏ க.தேவராஜி, ஒன்றியக்குழு தலைவா் சத்யா சதீஷ்குமாா்ஆகியோரிடம் புதிய தாா் சாலை அமைத்துத் தர வேண்டும் என கோரிக்கை வைத்தனா்.

இதையடுத்து நபாா்டு திட்டத்தின் மூலம் ரூ.26 லட்சத்தில் மூக்கனூரான் வட்டம் முதல் புள்ளானேரி செல்லும் இணைப்பு சாலை வரை புதிய தாா் சாலை அமைக்க எம்எல்ஏ தேவராஜி நடவடிக்கை மேற்கொண்டாா்.

இதையடுத்து திங்கள்கிழமை புதிய சாலை அமைக்கும் பணியை எம்எல்ஏ க.தேவராஜி பூமி பூஜை செய்து தொடங்கி வைத்தாா். இதில் ஊராட்சி மன்றத் தலைவா் அனுமந்தன், உறுப்பினா் செல்வி சாந்தன், துணைத் தலைவா் ராஜேஷ் மற்றும் கிராம மக்கள் கலந்து கொண்டனா்.