பள்ளிகொண்டாவில் குடியிருப்பை சூழ்ந்த மழை நீா்

பள்ளிகொண்டா பகுதியில் குடியிருப்பு பகுதியில் தேங்கிய மழை நீரை வெளியேற்றும் பணியை அணைக்கட்டு எம்எல்ஏ புதன்கிழமை ஆய்வு செய்தாா்.

தொடா் மழை காரணமாக தாழ்வான பகுதிகளில் மழை நீா் தேங்கி குடியிருப்புகளை சூழ்ந்துள்ளது. அணைக்கட்டு தொகுதி பள்ளிகொண்டா பேரூராட்சி தெருக்களில் மழைநீா் சூழ்ந்து பொதுமக்கள் அவதிக்குள்ளாயினா். இதுகுறித்து தகவல் அறிந்த அணைக்கட்டு எம்எல்ஏ ஏ.பி. நந்தகுமாா் ஆய்வு செய்தாா். தேசிய நெடுஞ்சாலை ஒப்பந்த நிறுவனமான எல் அன்ட் டி நிறுவன அதிகாரிகளுடன் ஆலோசனை நடத்தி குடியிருப்பு பகுதி, தெருக்களில் சூழ்ந்துள்ள மழைநீரை வெளியேற்ற நடவடிக்கை மேற்கொண்டாா்.

தொடா்ந்து ஒடுக்கத்தூா் பேரூராட்சி பகுதியில் நேமந்தபுரம் ஆற்றில் வெள்ளப் பெருக்கு ஏற்பட்டுள்ளதை பாா்வையிட்டு மலா் தூவினாா். கீழ்கொத்தூா் ஊராட்சியில் மழை காரணமாக வீடு இடிந்து விழுந்ததால் பாதிக்கப்பட்ட குடும்பத்துக்கு ஆறுதல் கூறி நிவாரண உதவி வழங்கினாா். அணைக்கட்டு தொகுதி புதுமனை எம்ஜிஆா் நகரில் குடியிருப்பு பகுதியை சூழ்ந்திருந்த மழை நீரை வெளியேற்ற நடவடிக்கை மேற்கொண்டாா். வேலூா் மாவட்ட ஊராட்சித் தலைவா் மு. பாபு உடனிருந்தாா்.