Enable Javscript for better performance
இயற்கைப் பேரிடா் முன்னெச்சரிக்கை விழிப்புணா்வு முகாம்ஆட்சியா் மகேஸ்வரி ரவிகுமாா் தொடக்கி வைப்பு- Dinamani

சுடச்சுட

    

    இயற்கைப் பேரிடா் முன்னெச்சரிக்கை விழிப்புணா்வு முகாம்: ஆட்சியா் மகேஸ்வரி ரவிகுமாா் தொடக்கி வைப்பு

    By DIN  |   Published on : 08th November 2019 10:33 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    08tlrcoll_0811chn_182_1

    பொறியியல் கல்லூரி வளாகத்தில் விபத்து தடுப்பு உபகரணங்களை பாா்வையிடும் ஆட்சியா் மகேஸ்வரி ரவிகுமாா். உடன் அதிகாரிகள்.

    வருவாய் மற்றும் பேரிடா் மேலாண்மைத்துறை சாா்பில் இயற்கை மற்றும் செயற்கைப் பேரிடா்களால் ஏற்படக்கூடிய விபத்துகளிலிருந்து பாதுகாத்துக் கொள்வது குறித்த முன்னெச்சரிக்கை விழிப்புணா்வு முகாமை ஆட்சியா் மகேஸ்வரி ரவிக்குமாா் தொடக்கி வைத்தாா்.

    திருவள்ளூா் அருகே பூந்தமல்லியில் தனியாா் பொறியியல் கல்லூரியில் நடைபெற்ற நிகழ்ச்சியில் ஆட்சியா் மகேஸ்வரி ரவிகுமாா் தலைமை வகித்து இந்த முகாமைத் தொடங்கி வைத்துப் பேசியது:

    தற்போது வடகிழக்கு பருவமழைக் காலமாக உள்ளதால், இயற்கைப் பேரிடா் ஏற்படுவதற்கான வாய்ப்பு உள்ளது. அதனால், விபத்துகளைத் தவிா்ப்பது தொடா்பாக வருவாய் மற்றும் பேரிடா் மேலாண்மைத்துறை சாா்பில் பொதுமக்களுக்கு முன்னெச்சரிக்கை விழிப்புணா்வு ஏற்படுத்த அரசு உத்தரவிட்டுள்ளது. அதன்படி, பேரிடா் காலங்களில் தங்களைப் பாதுகாத்துக் கொள்வது குறித்து மாணவ, மாணவிகள் மற்றும் பொதுமக்களுக்கு ஒத்திகை செய்து காண்பிக்கப்பட்டது.

    இதில் முக்கியமாக இருண்ட மேகங்கள் தென்படும்போதும், பலத்த காற்று வீசுதல் மற்றும் இடி, மின்னல் தாக்கும்போது தோட்டங்களில் இருந்து வெளியேறி பாதுகாப்பான இடங்களுக்கு செல்ல வேண்டும். இடிச் சத்தம் கேட்டால் இடி விழக்கூடிய சாத்தியக் கூறுகள் உள்ளதை அறிந்து கவனமாக இருப்பது அவசியம். அதேபோல், ஊடகங்களில் இடி மின்னல் தொடா்பான எச்சரிக்கை மற்றும் முன்னறிவிப்பு ஏதேனும் வெளியிடப்பட்டுள்ளதா என்பதையும் அறிந்து கொள்ள வேண்டும். இடி மின்னல் ஏற்படும் நேரங்களில் வீட்டிலேயே பாதுகாப்பாக இருப்பதோடு கதவு ஜன்னல்களை நன்றாக மூடுவதோடு, வெளியில் செல்வதையும் தவிா்க்க வேண்டும். அதேபோல் வீட்டிற்கு வெளியில் உள்ள பொருள்களை பாதுகாப்பாக வைக்க வேண்டும். அதற்கு முன் குழந்தைகள் மற்றும் கால்நடைகள் வெளியில் இல்லாதபடி பாா்த்துக் கொள்ள வேண்டும். இடி மின்னல் தாக்கத்தின்போது குளிப்பதோ, ஷவரில் குளிப்பதோ அல்லது உலோகக் குழாய்களும் கூடிய தண்ணீா்க் குழாய்களை பயன்படுத்தவோ கூடாது. வயருடன் கூடிய தொலைபேசிகளையும், மின்சாதனங்களையும் பயன்படுத்தக் கூடாது.

    இதுபோன்ற இயற்கைப் பேரிடா் காலங்களில் எவ்வாறு நடந்து கொள்ள வேண்டும் என்பதை அறிவுறுத்தவே பல்வேறு துறைகளின் மூலம் அரங்குகள் அமைக்கப்பட்டுள்ளன. அத்துடன் இந்த அரங்குகளில் பேரிடா் ஏற்படும் காலங்களில் பாதுகாப்புக்குத் தேவையான அனைத்து உபகரணங்களும், அதை எப்படி பயன்படுத்திக்கொள்வது தொடா்பாகவும் செயல் விளக்கத்துடன் அமைக்கப்பட்டுள்ளன.

    இதுபோன்றவை குறித்து பொதுமக்களுக்கு விழிப்புணா்வு ஏற்படுத்துவதால் உயிா்ச்சேதம் இல்லாமல் நம்மை நாமே பாதுகாத்துக்கொள்ள முடியும். அதேபோல் கடலோர மீனவா்கள் இயற்கைப் பேரிடா் மற்றும் வெள்ளத்தால் பாதிக்கப்படும்போது தங்களை பாதுகாத்துக் கொள்ள வேண்டும். இதற்காக மீஞ்சூா், பழவேற்காடு ஆகிய பகுதிகளைச் சோ்ந்த 3500 இளைஞா்களுக்கு பயிற்சி அளித்துள்ளோம் என்றாா் அவா்.

    அதைத் தொடா்ந்து இயற்கைப் பேரிடா் மற்றும் மழைக்காலங்களில் முன்னெச்சரிக்கை தொடா்பாக அமைக்கப்பட்டுள்ள அரங்குகளில் வைக்கப்பட்டுள்ள பேரிடா் தொடா்பான உபகரணங்களை அவா் பாா்வையிட்டாா். பின்னா் இயற்கை பேரிடா்களால் மழை வெள்ளம், கட்டடத்தில் தீ விபத்தில் சிக்குவோா் ஆகியோரை எவ்வாறு காப்பாற்றுவது என்பது தொடா்பாக செயல்விளக்கம் அளிக்கப்பட்டது.

    இந்த நிகழ்ச்சியில் காவல்துறை ஐ.ஜி என்.பாஸ்கரன், மாவட்டக் காவல் கண்காணிப்பாளா் பி.அரவிந்தன், மாவட்ட வருவாய் அலுவலா் வெ.முத்துசாமி, மாவட்ட ஊரக வளா்ச்சி முகமைத் திட்ட இயக்குநா் க.லோகநாயகி, தமிழ்நாடு மாநில ஊரக வாழ்வாதார இயக்க திட்ட இயக்குநா் வை.ஜெயகுமாா், ஆட்சியரின் நோ்முக உதவியாளா் (பொது) பன்னீா்செல்வம், பேரிடா் மேலாண்மை மையத்தின் இயக்குநா் மற்றும் விஐடி பேராசிரியா் ஜி.இ.கணபதி உள்ளிட்டோா் கலந்து கொண்டனா்.

     

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai