துணிக்கடையில் பணிபுரிவோா் தங்களை தனிமைப்படுத்திக் கொள்ள வேண்டும்: திருவள்ளூா் ஆட்சியா் வலியுறுத்தல்

திருவள்ளூா் அருகே கடம்பத்தூா் ஊராட்சி ஒன்றியப் பகுதியில் கரோனா நோய்த் தொற்று ஒருவருக்கு ஏற்பட்டதைத் தொடா்ந்து, அப்பகுதியில் உள்ள தனியாா் துணிக்கடையில் பணிபுரிவோா் மற்றும் அங்கு சென்று வந்தோா் தங்களை தனக்குத் தானே கட்டாயம் தனிமைப்படுத்திக் கொள்ள வேண்டும் என ஆட்சியா் மகேஸ்வரி ரவிகுமாா் தெரிவித்துள்ளாா்.

இதுகுறித்து அவா் வெளியிட்டுள்ள செய்திக் குறிப்பு:

கடம்பத்தூா் ஊராட்சி ஒன்றியம், பேரம்பாக்கம் ஊராட்சியைச் சோ்ந்த ஒருவா், புதுதில்லியில் நடைபெற்ற இஸ்லாமிய மாநாட்டில் பங்கேற்று கடந்த மாதம் 24-ஆம் தேதி வீடு திரும்பினாா். இதனால் அவா் பட்டரைபெரும்புதூரில் கரோனேனா சிறப்பு சிகிச்சை வாா்டில் கடந்த 1ஆம் தேதி அனுமதிக்கப்பட்டாா். அங்கு ரத்தப் பரிசோதனை செய்ததில் அவருக்கு கரோனா நோய்த் தொற்று உறுதியாகியிருந்தது.

முன்னதாக, அவா் தில்லி மாநாட்டுக்கு சென்று வந்த வந்த பின் கடம்பத்தூரில் உள்ள தனக்குச் சொந்தமான சீமாட்டி துணிக்கடைக்கு கடந்த மாதம் 24 முதல் 31-ஆம் தேதி வரை சென்று வந்துள்ளாா். எனவே, அந்தக் கடையில் வேலைபாா்த்து வரும் ஊழியா்கள் மற்றும் கடைக்கு வந்து சென்றவா்கள் ஆகியோா் கரோனா நோய்த் தொற்று பரவாமல் தடுக்கும் வகையில் தங்களைத் தாங்களே தனிமைப்படுத்திக் கொள்ள வேண்டும்.

பேரம்பாக்கம் ஊராட்சி மற்றும் அதைச் சுற்றியுள்ள 5 கி.மீ. தொலைவுக்குள் அடங்கிய ஊராட்சிகளின் எல்லைகள் மூடப்பட்டு கரோனா தடுப்பு நடவடிக்கைகள் எடுக்கப்பட்டு வருகின்றன. துணிக்கடை உரிமையாளருடன் தொடா்பில் இருந்தோருக்கு சளி, இருமல் மற்றும் காய்ச்சல் போன்ற அறிகுறிகள் இருந்தால் அரசு மருத்துவமனையில் தாங்களாக முன்வந்து பரிசோதனை செய்து கொள்ள வேண்டும் என்று ஆட்சியா் தெரிவித்துள்ளாா்.