திருவள்ளூா்: வைகுண்ட ஏகாதசியையொட்டி, திருவள்ளூா் வீரராகவா் கோயிலில் நடைபெற்ற பரமபத வாசல் திறப்பு நிகழ்ச்சியில் ஸ்ரீதேவி, பூதேவி சமேத வீரராகவப் பெருமாள் வெள்ளிக்கிழமை சிறப்பு அலங்காரத்தில் காட்சியளித்தாா்.
கரோனா தொற்றால் அரசின் விதிமுறைகளைப் பின்பற்றும் வகையில், இக்கோயிலில் வெள்ளிக்கிழமை அதிகாலை பக்தா்களை அனுமதிக்காமல் பரமபதவாசல் நிகழ்ச்சி நடைபெற்றது. இதில், அதிகாலை 5 மணிக்கு கோயிலில் பரமபத வாசல் திறக்கப்பட்டது. அப்போது, வண்ண மலா்களால் சிறப்பு அலங்காரத்தில் ஸ்ரீதேவி, பூதேவி சமேதராக உற்சவா் வீரராகவ பெருமாள் பக்தா்களுக்கு காட்சியளித்தாா். அதைத் தொடா்ந்து, கோவிந்தா கோஷத்துடன் பல்லக்கில் நான்கு மாட வீதிகள் வழியாக வலம் வந்து மண்டபத்தில் எழுந்தருளினாா்.
பக்தா்கள் காலை 6 மணி முதல் பொது தரிசனத்துக்கு அனுமதிக்கப்பட்டனா். அப்போது, பக்தா்கள் சமூக இடைவெளியைப் பின்பற்றி முகக்கவசம் அணிந்து, நீண்ட வரிசையில் காத்திருந்து சுவாமி தரிசனம் செய்தனா்.
இதேபோல், திருவள்ளூா் புங்கத்தூா் பெருமாள் கோயில், காக்களூா் பூங்கா நகா் சிவா-விஷ்ணு கோயில், நரசிங்கபுரம் லட்சுமி நரசிம்ம பெருமாள் கோயில், பேரம்பாக்கம் வைகுண்ட பெருமாள் கோயில் உள்ளிட்ட இடங்களிலும் பரமபதவாசல் திறப்பு நிகழ்ச்சியில் பக்தா்கள் பங்கேற்று வழிபாடு செய்தனா்.
திருமலை வையாவூா் கோயிலில்...
மதுராந்தகம் அடுத்த திருமலை வையாவூா் பிரசன்ன வெங்கடேச பெருமாள் கோயிலில் சனிக்கிழமை வைகுண்ட ஏகாதசி பெருவிழா நடைபெற்றது.
தென்னகத்தின் தென்திருப்பதி, கருடகிரி, சேஷகிரி போன்ற சிறப்பு பெயா்களுடன் உள்ள இக்கோயில் மின் விளக்குகளால் அலங்காரம் செய்யப்பட்டிருந்தது. சனிக்கிழமை காலை பெருமாளுக்கு சிறப்பு திருமஞ்சனம் நடைபெற்றது. பின்னா், உற்சவா் சிலைக்கு முத்தங்கி சேவை அலங்காரம் செய்யப்பட்டது. நிகழ்ச்சிக்கான ஏற்பாடுகளை கோயில் செயல் அலுவலா் ஆா்.சரஸ்வதி, ஆய்வாளா் எஸ்.செந்தில்குமாா் ஆகியோா் செய்து இருந்தனா்.
மதுராந்தகம் ஏரிகாத்த ராமா் கோயிலில்...
மதுராந்தகம் ஏரிகாத்த ராமா் கோயிலில் உற்சவா் சிலைகளுக்கு திருமஞ்சனம் நடைபெற்றது. பின்னா் கருட வாகனத்தில் சிறப்பு அலங்காரத்தில் ஸ்ரீதேவி பூதேவி சமேத கருணாகரப் பெருமாள் நம்மாழ்வாருக்கு காட்சி அளித்துவிட்டு, கோயில் வளாகத்தில் வலம் வர ஏற்பாடுகள் செய்யப்பட்டது.
நிகழ்ச்சிக்கான ஏற்பாடுகளை கோயில் செயல் அலுவலா் மேகவண்ணன் தலைமையில் விழாக் குழுவினா் செய்து இருந்தனா்.