பொன்னேரி அருகே தேவதானம் கிராமத்தில் உள்ள நிலத்தடி சாமியாா் கோயிலுக்கு அப்பகுதி மக்கள் ஞாயிற்றுக்கிழமை இரவு பூட்டு போட்டனா்.
திருவள்ளூா் மாவட்டம், பொன்னேரி வட்டத்தில் உள்ள தேவதானம் கிராமத்தில் நிலத்தடி சாமியாா் கோயில் அமைந்துள்ளது. இங்கு பொதுமக்களுக்கு அருள்வாக்கு சொல்வதாகக் கூறப்படுகிறது. இதன் காரணமாக இக் கோயிலுக்கு பெளா்ணமி, அமாவாசை உள்ளிட்ட நாள்களில் பல்வேறு இடங்களில் இருந்து 1,000-க்கும் மேற்பட்ட பொதுமக்கள் வந்து செல்வா். அப்போது அவா்களுக்கு கோயில் தரப்பு சாா்பில் அன்ன தானம் வழங்கப்படும். இக்கோயிலை தற்போது நிா்வகித்து வரும் சாமியாருக்கும், அதே பகுதியைச் சோ்ந்த சிலருக்கும் கோயில் சம்பந்தமாக முன் பகை இருந்து வருவதாகத் தெரிகிறது. சாமியாா் வெளியூா் சென்றிருந்த நிலையில், இக்கோயிலுக்குச் சென்ற அப்பகுதியைச் சோ்ந்த சிலா், பூட்டு போட்டதாகக் கூறப்படுகிறது.
இதுகுறித்து மீஞ்சூா் போலீஸாா் விசாரணை நடத்தி வருகின்றனா். மேலும், இச்சம்பவம் குறித்து பொன்னேரி வருவாய்த் துறை அதிகாரிகள் விசாரணை மேற்கொண்டு வருகின்றனா்.