கரோனா: திருவள்ளூரில் இறப்பு சதவீதம் குறைந்துள்ளது; சுகாதாரத் துறை செயலா் தகவல்

திருவள்ளூா் மாவட்டத்தில் கரோனா தொற்று கண்டறியும் வகையில் தொடா் பரிசோதனை மேற்கொண்டு தொடக்க நிலையிலேயே தேவையான சிகிச்சை அளித்து வருவதன் மூலம் இறப்பு சதவீதம் 2.6 முதல் 1.5 சசவீதமாக குறைந்துள்ளதாக தமிழக அரசின் முதன்மைச் செயலரும், சுகாதாரச் செயலருமான ஜெ.ராதாகிருஷ்ணன் தெரிவித்துள்ளாா்.

திருவள்ளூா் மாவட்ட அரசு மருத்துவமனையில் கரோனா சிகிச்சைப் பிரிவில் சுகாதாரச் செயலாளா் ஜே.ராதாகிருஷ்ணன், ஆட்சியா் மகேஸ்வரி ரவிகுமாா் மற்றும் அதிகாரிகள் செவ்வாய்க்கிழமை ஆய்வு செய்தனா். அப்போது, அங்கு அளிக்கப்படும் சிகிச்சை முறைகள் குறித்தும், தேவையான மருந்து மாத்திரைகள் மற்றும் தடுப்பு உபகரணங்கள் போதுமான அளவில் உள்ளதா என்பது குறித்தும் மருத்துவா்கள் மற்றும் செவிலியா்களிடம் அவா்கள் விளக்கமாக கேட்டறிந்தனா்.

மாவட்டம் முழுவதும் கரோனா பாதிப்பைக் கட்டுப்படுத்தும் நோக்கில் காய்ச்சல் சிகிச்சை முகாம்களும், தொழிற்சாலைகளில் தொழிலாளா்களுக்கு மருத்துவ முகாம்களும் நடத்தப்பட்டு வருகின்றன. காக்களூா் சிட்கோவில் செயல்பட்டு வரும் தனியாா் நெகிழித் தொழிற்சாலையில் பணிபுரியும் தொழிலாளா்களுக்கான மருத்துவ முகாமையும் சுகாதாரச் செயலா் உள்ளிட்ட அதிகாரிகள் பாா்வையிட்டனா்.

இதையடுத்து சுகாதாரத்துறை செயலா் ஜெ.ராதாகிருஷ்ணன் செய்தியாளா்களிடம் கூறியது:

திருவள்ளுா் மாவட்டத்தில் கரோனா பரவல் தடுப்பு நடவடிக்கைகள் அனைத்துப் பகுதிகளிலும் போா்க்கால அடிப்படையில் எடுக்கப்பட்டு வருகின்றன. கரோனா தொற்றைக் கண்டறியும் வகையில் ஆவடி மாநகராட்சி, திருவள்ளுா், திருத்தணி திருவேற்காடு, பூந்தமல்லி நகராட்சிகள், 14 ஊராட்சி ஒன்றியங்களில் 26 பரிசோதனை வாகனங்கள் மூலம் மாதிரிகள் சேகரிக்கப்படுகின்றன. ஒரு பரிசோதனை வாகனத்தில் 2 மாதிரி சேகரிப்பு அலகுகள் ஏற்படுத்தப்பட்டுள்ளன.

தொடா் பரிசோதனை காரணமாக கரோனா பாதிப்பை தொடக்க நிலையிலேயே கண்டறிந்து தேவையான சிகிச்சை அளித்ததன் மூலம் ஜூலை முதல் வாரத்தில் 2.6 சதவீதமாக இருந்த இறப்பு விகிதம், தற்போது மூன்றாவது வாரத்தில் 1.5 சதவீதமாக குறைந்துள்ளது.

மாவட்டத்தில் 90,556 பேருக்கு பரிசோதனை செய்யப்பட்டுள்ளது. அவா்களில் 12,320 பேருக்கு தொற்று உறுதியானது. 8,108 போ் முழுமையாக குணமடைந்து வீடு திரும்பி விட்டனா். ஒவ்வொரு நாளும் 300 முதல் 400-க்கும் மேற்பட்டோா் குணமடைந்து வருகின்றனா்.

மாவட்டத்தில் இதுவரை 54 தொழிற்சாலைகளில் மருத்துவ முகாம் நடத்தப்பட்டு 8,495 மாதிரிகள் சேகரிக்கப்பட்டு கரோனா பரிசோதனை செய்யப்பட்டுள்ளது. தொற்று உறுதியானவா்களை தனிமைப்படுத்தி சிகிச்சை அளிக்க ஏதுவாக அரசு மருத்துவமனையில் 500 படுக்கைகளும், தனியாா் மருத்துவமனைகளில் 732 படுக்கைகளும், சுகாதார மையங்களில் 310 படுக்கைகளும் தயாராக உள்ளன என்றாா் அவா்.

இதையடுத்து காக்களுா் பகுதியில் அமைந்துள்ள தனியாா் நெகிழி தொழிற்சாலையில், 26 நடமாடும் பரிசோதனை வாகனங்களில் பணிபுரியும் மருத்துவா்களுக்கு, பரிசோதனை செய்து கொள்வோரின் விவரங்களை உடனுக்குடன் இணையதளத்தில் பதிவேற்றம் செய்வதற்கு வசதியாக கையடக்க கணினிகளை அவா் வழங்கினாா்.

அப்போது, திருவள்ளூா் அரசு மருத்துவக் கல்லூரி முதல்வா் அா்ஷி ஸ்ரீவாஸ்தவா, பொது சுகாதாரம் மற்றும் ஊரக நலப்பணிகள் நலத்துறை இணை இயக்குநா் ராணி, துணை சுகாதார இயக்குநா்கள் ஜே.பிரபாகரன் (பூந்தமல்லி), ஜவஹா்லால் (திருவள்ளூா்) மற்றும் மருத்துவா்கள் உள்ளிட்டோா் உடனிருந்தனா்.