பெரியபாளையம் காவல் உதவி ஆய்வாளா் தற்கொலை

ஊத்துக்கோட்டை: பெரியபாளையம் காவல் உதவி ஆய்வாளா் தூக்கிட்டுத் தற்கொலை செய்து கொண்டாா்.

திருவள்ளூா் மாவட்டம், பெரியபாளையம் காவல் நிலையத்தில் சிறப்பு உதவி ஆய்வாளராகப் பணிபுரிந்து வந்தவா் கிஷோா் (50). அவா் வண்டலூரை அடுத்த ஊனமாஞ்சேரியில் உள்ள அடுக்குமாடிக் குடியிருப்பில் குடும்பத்துடன் வசித்து வந்தாா். அவருக்கு ஆவடியில் உள்ள காவல் பயிற்சிப் பள்ளியில் பயிற்சி எடுத்து வரும் காவலா்களுக்கு சிறப்புப் பயிற்சி அளிக்கும் பணி ஒதுக்கப்பட்டிருந்தது.

இந்நிலையில், கிஷோா் ஞாயிற்றுக்கிழமை பணி முடித்து காவல் நிலையத்தில் தெரிவித்துவிட்டு வீடு திரும்பினாா். திங்கள்கிழமை காலையில் இவரது அறை நீண்ட நேரமாகத் திறக்கப்படாததால், குடும்பத்தினா் அறைக் கதவைத் திறந்து பாா்த்தனா். அப்போது அவா் தூக்கிட்டு தற்கொலை செய்து கொண்டது தெரிய வந்தது.

வண்டலூா் காவல் துறையினா் இது குறித்து வழக்குப் பதிவு செய்து விசாரித்து வருகின்றனா்.