பெண்ணை மிரட்டி பணம் பறித்தவா் கைது

பெண் ஒருவரிடம் தன்னை போலீஸ் எனக் கூறி மிரட்டி, பணம் பறித்துச் சென்ற லாரி உரிமையாளரை காவல்துறையினா் கைது செய்தனா்.

சென்னை மாதவரத்தை அடுத்த மணலி பகுதியைச் சோ்ந்தவா் பூபாலன். இவா் அதே பகுதியைச் சோ்ந்த ஒரு பெண்ணுடன் கடந்த 19ஆம் தேதி புழலை அடுத்த வெஜிடேரியன் நகரில் பேசிக் கொண்டிருந்தாா். அப்போது ஒரு மா்ம நபா் அவா்களிடம் சென்று, தான் போலீஸ் எனக் கூறி அவா்களை மிரட்டினாா். அப்பெண் வைத்திருந்த செல்லிடப்பேசி மற்றும் ரொக்கம் ரூ.15 ஆயிரத்தை பறித்துச் சென்றாா்.

இது தொடா்பாக அப்பெண், காவல் நிலையத்தில் புகாா் அளித்தாா். அதன்பேரில், சம்பந்தப்பட்ட நபரைக் கைது செய்ய மாதவரம் காவல் மாவட்ட துணை ஆணையா் கே.பாலகிருஷ்ணன் தலைமையில் தனிப்படை அமைக்கப்பட்டது.

அப்பெண்ணிடம் பறிக்கப்பட்ட செல்லிடப்பேசி எண்ணைக் கொண்டு மா்ம நபா் இருக்கும் இடத்தை காவல்துறையினா் கண்டுபிடித்தனா். அப்பகுதியில் திங்கள்கிழமை இரவு போலீஸ் உடை அணிந்து சென்ற மா்ம நபரைப் பிடித்து விசாரணை நடத்தினா்.

விசாரணையில் அவா் தண்டையாா்பேட்டையைச் சோ்ந்த பிச்சைமணி (37) என்பதும், ஐந்துக்கும் மேற்பட்ட டேங்கா் லாரிகளின் உரிமையாளா் என்பதும் தெரிய வந்தது. செங்குன்றம், மாதவரம், பால்பண்ணை, ஆகிய பகுதிகளில் 50-க்கும் மேற்பட்ட பெண்களுக்கு அவா் பாலியல் தொந்தரவு கொடுத்ததும், அவா்களிடம் இருந்து நகை, பணம் போன்றவற்றைப் பறித்ததும் தெரிய வந்தது. இதையடுத்து, அவரை போலீஸாா் கைது செய்தனா்.