இன்றும், நாளையும் கரோனா தடுப்பூசி சிறப்பு மருத்துவ முகாம்

திருவள்ளூா்: பொது சுகாதாரம் மற்றும் நோய்த் தடுப்பு மருந்து துறை சாா்பில் பொதுமக்களுக்கு (ஏப்.29,30) வியாழன், வெள்ளிக்கிழமை என 2 நாள்கள் தடுப்பூசி சிறப்பு மருத்துவ முகாம் நடைபெற உள்ளதாக ஆட்சியா் பா.பொன்னையா தெரிவித்துள்ளாா்.

திருவள்ளுா் மாவட்டத்தில் கரோனா நோய் தொற்று இரண்டாம் அலை வேகமாகப் பரவி வருகிறது. அந்த வகையில் புதன்கிழமை மட்டும் 751 போ் தொற்றால் பாதிக்கப்பட்டு அரசு மருத்துவமனைகளில் சிகிச்சை பெற்று வருகின்றனா். மேலும், நோய்த்தொற்று பரவாமல் தடுக்கும் வகையில் பொதுமக்களுக்கு தடுப்பூசி போடப்பட்டு வருகிறது. அந்த வகையில் (ஏப்.29,30) என இருநாள்களுக்கு தடுப்பூசி போடும் சிறப்பு மருத்துவ முகாம் ஏற்பாடு செய்யப்பட்டுள்ளது.

மேலும், இப்பணியில் 33 நடமாடும் வாகனங்களும், 33 மருத்துவ குழுக்களும் அமைக்கப்பட்டு பணிகளை மேற்கொள்ள உள்ளனா். இதில் நாள்தோறும் சராசரியாக 6,000 தடுப்பூசிகள் வீதம் ஆவடி மாநகராட்சி, திருவள்ளுா், திருவேற்காடு, பூந்தமல்லி ஆகிய நகராட்சிகளிலும், திருநின்றவூா், மீஞ்சூா் பேரூராட்சிகளிலும், , அயப்பாக்கம், காட்டுப்பாக்கம் மற்றும் ஈக்காடு ஊராட்சிகளிலும் என மக்கள் தொகை அதிகம் உள்ள பகுதிகளில் சிறப்பு தடுப்பூசி மருத்துவ முகாம் நடைபெற உள்ளது.

இந்த இரண்டு நாள்களிலும் 22,000 பேருக்கு மேற்பட்டோருக்கு தடுப்பூசி போட ஏற்பாடு செய்யப்பட்டுள்ளது. தற்போதைய நிலையில் மாவட்டத்தில் ஒவ்வொரு பகுதியிலும் நாள்தோறும் சுமாா் 5,000 தடுப்பூசிகள் போடப்படுகின்றன. அதனால் மேற்குறிப்பிட்ட நாள்களில் நடைபெற உள்ள தடுப்பூசி மருத்துவ முகாமை பொதுமக்கள் பயன்படுத்திக் கொள்ள வேண்டும்.

தடுப்பூசிகள் போட்டுக் கொள்வது பாதுகாப்பானது எனவும், அதனால் எந்த விதமான பக்க விளைவுகளும் கிடையாது. ஒவ்வொருவரும் தன்னையும், தன்னுடைய குடும்பத்தினா், சுற்றத்தாா் மற்றும் நண்பா்களை பாதுகாத்துக் கொள்ளும் வகையில் தடுப்பூசி போட்டுக் கொள்ள வேண்டும். தடுப்பூசி போட வருவோா் கட்டாயம் ஆதாா் அட்டைகளை கொண்டு வர வேண்டும் என்றாா்.