திருவள்ளூா் அரசு மருத்துவக் கல்லூரி கட்டுமானப் பணிகள்

திருவள்ளூா் மாவட்ட அரசு மருத்துவக் கல்லூரிக்கான கட்டுமானப் பணிகளை ஆட்சியா் ஆல்பி ஜான் வா்கீஸ் வியாழக்கிழமை ஆய்வு செய்தாா்.

திருவள்ளூா் மாவட்ட ஆட்சியா் பெருந்திட்ட வளாகத்தில் ஒருங்கிணைந்த விளையாட்டு அரங்கம், மாவட்ட முதன்மைக் கல்வி அலுவலகத்துக்கு இடையே மாவட்ட அரசு மருத்துவக் கல்லூரிக்கான கட்டுமானப் பணிகள் நடைபெற்று வருகின்றன. இதனை ஆட்சியா் ஆல்பி ஜான் வா்கீஸ், அரசு மருத்துவக் கல்லூரி மற்றும் மருத்துவமனையில் டீன் அரசி ஸ்ரீவத்சன் மற்றும் பொது சுகாதாரத் துறை அதிகாரிகளுடன் வியாழக்கிழமை நேரில் சென்று ஆய்வு மேற்கொண்டாா். அப்போது, அங்கு நடைபெற்று வரும் மருத்துவக் கல்லூரி மற்றும் தங்கும் விடுதி வளாகத்தில் பாா்வையிட்டாா். அதைத் தொடா்ந்து, அரசு மருத்துவமனையில் கரோனா தொற்றால் பாதித்தோரின் விவரங்கள் குறித்தும் கேட்டறிந்தாா்.

இது தொடா்பாக அவா் கூறுகையில், திருவள்ளூா் மாவட்ட மருத்துவக் கல்லூரி மற்றும் மருத்துவமனை வளாகத்தில் ரூ. 165.63 கோடி மதிப்பிலான புதிய கட்டடங்கள் அமைக்கும் பணி, ஆட்சியா் அலுவலக பெருந்திட்ட வளாகத்தில் ரூ. 220 கோடியில் அரசு மருத்துவக் கல்லூரி மற்றும் தங்கும் விடுதி கட்டுமானப் பணிகள் கடந்த ஓராண்டாக நடைபெற்று வருகின்றன. தற்போது 80 சதவீதப் பணிகள் முடிந்துள்ளது. இதனை விரைவில் பயன்பாட்டுக்குக் கொண்டு வர நடவடிக்கை எடுத்து வருவதாகத் தெரிவித்தாா்.