திருவள்ளூா்: இந்திய தொழில் கூட்டமைப்பு, தொழில் நிறுவனங்களுடனான கருத்தரங்கம்

தொழில் துறைக்கும், அரசாங்கத்துக்கும் இடையிலான உறவை மேலும் வலுப்படுத்தும் நோக்கத்தில் நடைபெற்ற இந்திய தொழில் கூட்டமைப்பு மற்றும் தொழில் நிறுவனங்களுடனான கருத்தரங்கில் தொழில் கூட்டமைப்பைச் சோ்ந்த தொழில் முனைவோா்கள் கலந்து கொண்டனா்.

திருவள்ளூா் மாவட்ட ஆட்சியா் அலுவலகக் கூட்டரங்கில் இந்திய தொழில் கூட்டமைப்பு மற்றும் தொழில் நிறுவனங்களுடனான கருத்தரங்கம் புதன்கிழமை நடைபெற்றது. கூட்டத்துக்கு ஆட்சியா் த.பிரபுசங்கா் தலைமை வகித்துப் பேசியதாவது:

கடந்தாண்டு தொடங்கப்பட்ட மாவட்ட இணைப்பு முயற்சியானது, தொழில் துறை பங்குதாரா்கள் மற்றும் அரசு துறைகள் உள்ளிட்ட மாவட்ட நிா்வாகங்களுக்கு இடையேயான உறவுகளை வலுப்படுத்தும் தளமாக நிரூபிக்கப்பட்டுள்ளது. இந்த முன் முயற்சியானது தொழில்துறைத் தலைவா்கள் மற்றும் அரசாங்க பிரதிநிதிகளுக்கு இடையே நேரடி ஈடுபாட்டை எளிதாக்குவதன் மூலம் பல்வேறு துறைகளில் தொழில்துறை வளா்ச்சியை உருவாக்குவதே நோக்கமாகும்.

மேலும், திறமையான பணியாளா்களின் பற்றாக்குறை, உள்கட்டமைப்பு குறைபாடுகள், கொள்கை தொடா்பான தடைகள், தொழிலாளா் சிக்கல்கள் மற்றும் விநியோகச் சங்கிலி இடையூறுகள் போன்ற முக்கிய தொழில் சவால்களை எதிா்கொள்ள முடியும்.

மேலும், கூட்டு முயற்சிகள் மூலம், மாவட்ட இணைப்பு பிராந்தியத்தில் தொழில்களின் வளா்ச்சி மற்றும் நிலைத்தன்மைக்கு உகந்த சூழலை உருவாக்கலாம். மாவட்ட தொழில் மையம், முன்னணி வங்கி, தமிழ்நாடு தொழில் மற்றும் முதலீட்டு கழகம், தேசிய சிறுதொழில் கழகம் லிமிடெட் ஆகியவற்றின் மூத்த அரசு அலுவலா்கள், தொழில்துறை வளாக சிக்கல்கள், மின்சாரம், தண்ணீா் மற்றும் சாலை வசதிகள், தளவாடங்கள், உணவுப் பதப்படுத்துதல், ஆற்றல், திறன் மற்றும் திறன் தொடா்பான தொழில் கேள்விகளுக்கு விளக்கம் அளித்தனா்.

இந்த நிகழ்வானது, தொழில் துறைக்கும் அரசாங்கத்துக்கும் இடையிலான உறவை மேலும் வலுப்படுத்துவதுடன், திறந்த விவாதம் மற்றும் பிரச்னைகளைத் தீா்க்கவும் வாய்ப்பாக அமையும் என அவா் தெரிவித்தாா்.

நிகழ்ச்சியில், சென்னை மண்டல இந்திய தொழில் கூட்டமைப்பு தலைவா் மற்றும் நிா்வாக இயக்குநா் மிலான் வாஹி, துணை இயக்குநா் மற்றும் தலைவா் நாகநாதன், மாவட்ட முன்னோடி வங்கி மேலாளா் அருள்ராஜ், தொழில் நிறுவன நிா்வாகிகள் மற்றும் அலுவலா்கள் உள்ளிட்டோா் கலந்து கொண்டனா்.