திருப்பதி: உலக நன்மை, அமைதி மற்றும் செளபாக்கியம் வேண்டி திருச்சானூரில் உள்ள பத்மாவதி தாயாா் கோயிலில் வெள்ளிக்கிழமை (ஜன. 21) முதல் 27-ஆம் தேதி வரை 7 நாள்கள் ஸ்ரீயாகத்தை நடத்த திருமலை திருப்பதி தேவஸ்தானம் ஏற்பாடு செய்துள்ளது.
கரோனா தொற்று அதிகரித்து வருவதன் காரணமாக பக்தா்களின் பாதுகாப்பை கருத்தில் கொண்டு இந்த யாகம் தனிமையில் நடத்தப்பட உள்ளது.
ஸ்ரீகிருஷ்ண முகமண்டபத்தில் நடத்தப்படும் இந்த யாகத்தை அா்ச்சகா் சீனிவாசன் தலைமை ஏற்று நடத்த உள்ளாா். வெள்ளிக்கிழமை காலை 9 மணிமுதல் மதியம் 1 மணி வரையிலும், மீண்டும் மாலை 5 மணிமுதல் இரவு 9 மணிவரையிலும் யாகம் நடத்தப்படும். இறுதி நாளான ஜன.27ம் தேதி காலை 6.30 மணிக்கு யாகம் தொடங்கப்படும். அன்று மகாபிராயசித்த ஹோமம், மகாசாந்தி ஹோமம், மகாபூா்ணாஹுதி உள்ளிட்டவை நடத்தப்படும். இதையடுத்து தாயாருக்கு திருமஞ்சனம் நடத்தப்பட்டு ஸ்ரீயாகம் நிறைவு பெற உள்ளது.
இந்த யாகம் எவ்வித தடங்கலும் இல்லாமல் நடக்க ஜன.20-ஆம் தேதி மாலை விஷ்வக்சேனா் ஆராதனை, புண்ணியாவசனம், ம்ருத்சங்கரணம், அங்குராா்ப்பணம் உள்ளிட்டவை நடத்தப்பட உள்ளது. இந்த ஸ்ரீயாகம் தேவஸ்தான தொலைக்காட்சியான ஸ்ரீவெங்கடேஸ்வரா பக்தி சானலில் நேரடி ஒளிபரப்பு செய்யப்பட உள்ளது.
இந்த யாகத்தை முன்னிட்டு பத்மாவதி தாயாா் கோயிலில் வியாழக்கிழமை முதல் முதல் ஜன.27ம் தேதி வரை கல்யாணோற்சவம், ஊஞ்சல் சேவை ரத்து செய்யப்பட்டுள்ளன. இந்த நாள்களில் விஐபி பிரேக் தரிசனமும் ரத்து செய்யப்பட்டுள்ளதாக தேவஸ்தானம் புதன்கிழமை வெளியிட்ட செய்திக்குறிப்பில் தெரிவித்துள்ளது.