சேத்துப்பட்டை அடுத்த கரிப்பூர் கிராமத்தில் அமைந்துள்ள கருமாரி அம்மன் கோயிலில் உண்டியலை உடைத்து காணிக்கை ரூ. ஒரு லட்சம், 2 பவுன் தங்க நகைகளை திருடிச் சென்ற மர்ம நபர்களை போலீஸார் தேடி வருகின்றனர்.
கரிப்பூர் கிராமத்தில் பழைமைவாய்ந்த கருமாரி அம்மன் கோயில் அமைந்துள்ளது. இந்தக் கோயில் கடந்த 2 ஆண்டுகளுக்கு முன்பு புதுப்பிக்கப்பட்டு கும்பாபிஷேகம் நடத்தப்பட்டது. அன்று முதல் ஏராளமான பக்தர்கள் கோயிலுக்குச் சென்று வழிபட்டதுடன், உண்டியலில் காணிக்கையாக பணம், நகைகளை செலுத்தி வந்தனர். கடந்த 2 ஆண்டுகளாக உண்டியல் காணிக்கை எண்ணப்படாமல் இருந்து வந்தது.
இந்த நிலையில், வியாழக்கிழமை நள்ளிரவில் கோயிலுக்குள் புகுந்த மர்ம நபர்கள், உண்டியலை உடைத்து அதிலிருந்த காணிக்கை ரூ. ஒரு லட்சம், 2 பவுன் தங்க நகைகளை திருடிச் சென்றனர். இதுகுறித்து கரிப்பூர் கிராம மக்கள் சேத்துப்பட்டு காவல் நிலையத்தில் புகார் அளித்தனர். போலீஸார் வழக்குப் பதிவு செய்ததுடன், சம்பவ இடத்துக்குச் சென்று விரல் ரேகைகளையும் பதிவு செய்து விசாரணை மேற்கொண்டுள்ளனர்.