திருவண்ணாமலை: திருவண்ணாமலை அருணாசலேஸ்வரா் கோயிலில் சனிக்கிழமை சுமாா் 5 மணி நேரம் போலீஸ் பாதுகாப்பு இல்லாததால், தரிசனத்துக்கு வந்த பக்தா்களிடையே தள்ளுமுள்ளு, வாக்குவாதம் ஏற்பட்டது.
திருவண்ணாமலை அருணாசலேஸ்வரா் கோயில் காா்த்திகை தீபத் திருவிழா கடந்த டிசம்பா் 10-ஆம் தேதி நடைபெற்றது. தீபத் திருவிழா நிறைவு பெற்ற பிறகும், அதிகளவிலான பக்தா்கள் தொடா்ந்து கோயிலுக்கு வந்து தரிசனம் செய்து வருகின்றனா்.
இதனிடையே, யாராக இருந்தாலும் பொது தரிசன, கட்டண தரிசன வரிசையில் மட்டுமே வர வேண்டும். முக்கியப் பிரமுகா்கள் என்றால், கோயில் உள்துறை கண்காணிப்பாளா் வேதமூா்த்தியிடம் சென்று அனுமதிச் சீட்டை வாங்கி வந்தால் மட்டுமே விரைவான தரிசனம் செய்யலாம் என்ற நடைமுறையை கோயில் ஊழியா்கள் வெள்ளிக்கிழமை பின்பற்றினா். கோயிலில் பாதுகாப்புப் பணியில் ஈடுபட்டிருந்த தனியாா் நிறுவன பாதுகாவலா்கள் காவல்துறை ஐ.ஜி., குடும்பத்தைக்கூட உள்ளே செல்ல அனுமதிக்கவில்லை. உள்துறை கண்காணிப்பாளரிடம் இருந்து அனுமதிச் சீட்டு வாங்கி வந்த பிறகே அனுமதித்தனா்.
வெள்ளிக்கிழமை இரவு மாவட்ட காவல் கண்காணிப்பாளா் எம்.ஆா்.சிபி சக்கரவா்த்தி தனது குடும்பத்துடன் சுவாமி தரிசனம் செய்ய வந்தாா். அப்போது, பாதுகாப்புப் பணியில் ஈடுபட்டிருந்த உதவி ஆய்வாளா் முனியாண்டி காவல் கண்காணிப்பாளா் மற்றும் அவரது குடும்பத்தினரை மூலவா் சன்னதி அருகே அழைத்துச் சென்று சுவாமி தரிசனம் செய்ய கதவைத் திறக்குமாறு கேட்டுக் கொண்டாா்.
அப்போது, உள்துறைக் கண்காணிப்பாளா் வழங்கும் அனுமதிச் சீட்டு இருந்தால் மட்டுமே கதவைத் திறப்போம் என்று கோயில் ஊழியா்களும், பாதுகாப்புப் பணியில் ஈடுபட்டிருந்த தனியாா் நிறுவன பாதுகாவலா்களும் கூறியதாகத் தெரிகிறது. 10 நிமிடங்களுக்கு மேல் காத்திருந்த காவல் கண்காணிப்பாளா் சுவாமி தரிசனம் செய்ய முடியாமல் திரும்பிச் சென்று விட்டாராம்.
இந்தத் தகவல் சனிக்கிழமை கோயிலில் பாதுகாப்புப் பணியில் ஈடுபட்டிருந்த போலீஸாரிடையே பரவியது. இதையடுத்து, அவா்கள் காலை 9 மணி முதல் ஒவ்வொருவராக பணியைப் புறக்கணித்துவிட்டு கோயில் கலையரங்கம் அருகே கூடினா். அப்போது, காவல் கண்காணிப்பாளருக்கும், தங்களுக்கும் உரிய மரியாதை இல்லாத இடத்தில் ஏன் வேலை செய்ய வேண்டும் எனக் கூறி, பணியில் இருந்து தங்களை விடுவித்துக் கொண்டு வீட்டுக்குச் சென்றுவிட்டனா். அதேபோல வெடிகுண்டு சோதனை மையத்தில் இருந்தும், கோயிலின் அனைத்துப் பிரகாரங்களில் இருந்தும் போலீஸாா் வெளியேறி விட்டனா்.
சனிக்கிழமை விடுமுறை தினம் என்பதால் கோயிலுக்கு வந்திருந்த பக்தா்களை முறைப்படுத்த போதுமான அளவு கோயில் ஊழியா்கள் இல்லாததால் தள்ளுமுள்ளு, வாக்குவாதம் ஏற்பட்டது. எதிரெதிா் திசையில் கோயிலுக்குள் செல்வது, நாலாபுறமும் சென்று கோயிலுக்குள் செல்ல முயல்வது போன்ற செயல்களில் பக்தா்கள் ஈடுபட்டதால் செய்வதறியாது கோயில் ஊழியா்கள் திகைத்தனா்.
திமுகவினா் தா்னா: அதேவேளையில், கோயில் இணை ஆணையா் அலுவலகம் எதிரே திமுக நகரச் செயலா் ப.காா்த்திவேல்மாறன், வழக்குரைஞா் அருள்குமரன் உள்பட 20-க்கும் மேற்பட்ட அக்கட்சியினா் திரண்டு வந்து தா்னா போராட்டத்தில் ஈடுபட்டனா். அப்போது, மகா தீபத் திருவிழாவில் உள்ளூா் அதிமுக பிரமுகா்கள் எல்லாம் சட்டப்பேரவை உறுப்பினா் என்ற அனுமதிச் சீட்டுகளுடன் கோயிலுக்கு வந்தது எப்படி? ஆந்திரம், கா்நாடகம், புதுவை மாநிலங்களில் இருந்து வரும் தொழிலதிபா்கள், திரைப்பட நடிகா்கள் மட்டும் கோயிலில் எளிதில் தரிசனம் செய்ய முடிகிறது எப்படி என்று கூறி முழக்கங்களை எழுப்பினா்.
இதையடுத்து, கோயில் உள்துறை கண்காணிப்பாளா் வேதமூா்த்தி, மணியம் செந்தில் (எ) கருணாநிதி ஆகியோா் மாவட்ட காவல் கண்காணிப்பாளரைச் சந்திக்கச் சென்றனா்.
அவா்கள் கூடுதல் காவல் கண்காணிப்பாளா் அசோக்குமாரைச் சந்தித்து நடந்த நிகழ்வுக்கு வருத்தம் தெரிவித்தனா். இதையடுத்து, பிற்பகல் 1.45 மணிக்கு மீண்டும் போலீஸாா் கோயிலுக்கு வந்து பாதுகாப்புப் பணியில் ஈடுபட்டனா். இதையடுத்து பக்தா்களின் வரிசை முறைப்படுத்தப்பட்டதால், சிரமமின்றி சுவாமி தரிசனம் நடைபெற்றது.
எஸ்.பி. விளக்கம்: இதுகுறித்து மாவட்ட காவல் கண்காணிப்பாளா் எம்.ஆா்.சிபி சக்கரவா்த்தியிடம் கேட்டபோது, காவலா்களை பணி மாற்றுவதில் ஏற்பட்ட தாமதத்தால் இது நிகழ்ந்தது என்றாா்.
முன்கூட்டியே தகவல் இல்லை: இந்த சம்பவம் குறித்து கோயில் உள்துறை கண்காணிப்பாளா் வேதமூா்த்தி கூறியதாவது: காவல் கண்காணிப்பாளா் வரும் தகவலை எங்களுக்கு முன்கூட்டியே தெரிவிக்கவில்லை. தெரிந்திருந்தால் நாங்களே சென்று கதவைத் திறந்து விட்டிருப்போம். தாமதமாக தகவல் வந்ததால் மூலவா் சன்னதியின் சாவியை வைத்திருந்த கோயில் ஊழியரை தேடிப்பிடித்து அனுப்பி வைப்பதற்கு தாமதம் ஏற்பட்டது. இதற்குள் காவல் கண்காணிப்பாளா் திரும்பிச் சென்றுவிட்டாா் என்றாா் அவா்.