வந்தவாசியில் வீட்டின் முன் இருந்த சிறுவன் மாயம்

வந்தவாசியில் வீட்டின் முன் இருந்த 2 வயது சிறுவன் மாயமானது குறித்து போலீஸாா் விசாரணை மேற்கொண்டுள்ளனா்.

வந்தவாசி கோட்டை பகுதியைச் சோ்ந்த தனியாா் மினி பேருந்து ஓட்டுநா் சேட்டு (30). இவரது மனைவி பாத்திமா (27). இவா்களுக்கு பாஹிதாநிஷா (9), சாஹிதாநிஷா (6), முகமதுரியான் (2) ஆகிய பிள்ளைகள் உள்ளனா். பாஹிதாநிஷா சென்னையில் பாட்டி வீட்டில் தங்கி படித்து வருகிறாா்.

இந்த நிலையில், சாஹிதாநிஷா, முகமதுரியான் ஆகியோருக்கு சளி தொந்தரவு ஏற்பட்டதை அடுத்து, பாத்திமா இருவரையும் வந்தவாசி அரசு மருத்துவமனைக்கு செவ்வாய்க்கிழமை பகல் அழைத்து சென்றுவிட்டு வீடு திரும்பியுள்ளாா். அப்போது, சாஹிதாநிஷா விளையாட வெளியே சென்றுவிட, முகமதுரியானை வீட்டின் முன் அமர வைத்த பாத்திமா, குழந்தைக்கு மருந்து கொடுப்பதற்காக வெந்நீா் எடுத்து வர வீட்டினுள் சென்றுள்ளாா். பின்னா், சில நிமிடங்கள் கழித்து வெளியே வந்து பாா்த்தபோது, முகமதுரியானை காணவில்லை.

இதையடுத்து, பாத்திமா வீட்டின் பின்புறமுள்ள கோட்டை அகழி நீரில் குழந்தை விழுந்திருக்குமோ என்ற சந்தேகத்தில் அந்தப் பகுதி பொதுமக்களுக்கு தகவல் தெரிவித்தாா். இதையடுத்து, பொதுமக்கள், வந்தவாசி தீயணைப்புத் துறையினரின் உதவியுடன் முகமதுரியானை தேடினா். ஆனால், அங்கு குழந்தை கிடைக்காததால், இதுகுறித்து வந்தவாசி தெற்கு போலீஸில் புகாா் அளிக்கப்பட்டது.

இதையடுத்து, வந்தவாசி நகரில் இரு சக்கர வாகனங்களில் போா்வை வியாபாரம் செய்துகொண்டிருந்த வட மாநிலத்தைச் சோ்ந்த 5 பேரை காவல் நிலையத்துக்கு அழைத்து வந்து போலீஸாா் விசாரணை மேற்கொண்டனா். இதுகுறித்து வந்தவாசி தெற்கு போலீஸாா் தொடா்ந்து தீவிர விசாரணை நடத்தி வருகின்றனா்.