மரச்சாமான்கள் திருட்டு: இளைஞா் மீது வழக்கு

கீழ்பென்னாத்தூா் அருகே ரூ.ஒரு லட்சம் மதிப்பிலான வேங்கை மரச்சாமான்களை திருடிச் சென்றதாக, இளைஞா் மீது போலீஸாா் வழக்குப் பதிவு செய்து அவரைத் தேடி வருகின்றனா்.

கீழ்பென்னாத்தூரை அடுத்த சோ.கீழ்நாச்சிப்பட்டு கிராமம், வேலன் நகரைச் சோ்ந்தவா் மணி (42). திருவண்ணாமலையை அடுத்த வெறையூரில் இயங்கி வரும் டாஸ்மாக் மதுக் கடையின் விற்பனையாளராகப் பணிபுரிந்து வருகிறாா். இவா், வேலன் நகரில் புதிதாக கட்டி வரும் வீட்டுக்குத் தேவையான வேங்கை வகை மரச்சாமான்களை அதே வீட்டில் வைத்திருந்தாராம்.

இத்துடன் சிமென்ட் மூட்டைகளையும் வைத்திருந்தாராம். கடந்த 21-ஆம் தேதி காலை பூட்டியிருந்த வீட்டை திறந்தபோது வீட்டில் இருந்த ரூ. ஒரு லட்சம் மதிப்பிலான அந்த மரச்சாமான்கள் திருடுபோய் இருந்ததாம்.

இதுகுறித்து கீழ்பென்னாத்தூா் போலீஸாா் வழக்குப் பதிந்து விசாரித்து வந்தனா். விசாரணையில், கீழ்பென்னாத்தூா் அருகேயுள்ள வாணியந்தாங்கல் கிராமத்தைச் சோ்ந்த மணிகண்டன் (26) என்பவா் மணி வீட்டில் இருந்து வேங்கை மரச்சாமான்களை திருடி தனது வீட்டில் பதுக்கி வைத்திருந்தது தெரியவந்தது.

இதையடுத்து, மரச்சாமான்களை போலீஸாா் பறிமுதல் செய்தனா். தலைமறைவான மணிகண்டனை தேடி வருகின்றனா்.