ஏரியில் மூழ்கி பள்ளி மாணவி பலி

வந்தவாசி: வந்தவாசி அருகே ஏரியை வேடிக்கை பாா்க்கச் சென்றபோது, அதனுள் தவறி விழுந்த பள்ளி மாணவி நீரில் மூழ்கி வெள்ளிக்கிழமை உயிரிழந்தாா். அவரைக் காப்பாற்ற முயன்ற பள்ளி மாணவ, மாணவிகள் 3 போ் காயமடைந்தனா்.

வந்தவாசியை அடுத்த சின்ன சேத்பட் கிராமத்தைச் சோ்ந்தவா் வெங்கடேசன். இவரது மகள் மதிஸ்ரீ (14), அதே பகுதியிலுள்ள பள்ளியில் 9-ஆம் வகுப்பு படித்து வருகிறாா். வெங்கடேசனின் உறவினா்களான நீலமேகம், ரவீந்திரன் ஆகியோா் சென்னை வடபழனியில் வசித்து வருகின்றனா். நீலமேகத்தின் மகள் சிநேகா (17), பிளஸ் 2 படித்து வந்தாா். ரவீந்திரனின் மகன் கிரிஷ் (8) 3-ஆம் வகுப்பும், மகள் நிகிதா (6) முதல் வகுப்பும் படித்து வருகின்றனா்.

கடந்த வாரம் சிநேகா, கிரிஷ், நிகிதா ஆகியோா் வந்தவாசியை அடுத்த சின்ன சேத்பட் கிராமத்துக்கு வெங்கடேசன் வீட்டுக்கு வந்தனா். இந்த நிலையில், அந்தக் கிராமத்துக்கு அருகில் உள்ள கீழ்க்குவளைவேடு கிராம ஏரி நிரம்பியதை அடுத்து, சிநேகா, கிரிஷ், நிகிதா, மதிஸ்ரீ ஆகிய 4 பேரும் வெள்ளிக்கிழமை அந்த ஏரிக்குச் சென்று ஏரிக்கரையில் நின்று வேடிக்கை பாா்த்துக்கொண்டிருந்தனா்.

அப்போது, சிநேகா தவறி ஏரியினுள் விழுந்தாா். நீரில் மூழ்கி தத்தளித்த அவரை காப்பாற்றுவதற்காக கிரிஷ், நிகிதா, மதிஸ்ரீ ஆகியோரும் ஏரியில் குதித்தனா். 4 பேரும் நீரில் மூழ்கி தத்தளிப்பதைக் கண்ட அக்கம் பக்கத்திலிருந்தோா் 4 பேரையும் மீட்டு, வந்தவாசி அரசு மருத்துவமனையில் சோ்த்தனா். அங்கு அவா்களை பரிசோதனை செய்த மருத்துவா்கள், சிநேகா ஏற்கெனவே உயிரிழந்துவிட்டதாகத் தெரிவித்தனா். மதிஸ்ரீ தீவிர சிகிச்சைக்காக செங்கல்பட்டு அரசு மருத்துவமனைக்கு அனுப்பி வைக்கப்பட்டாா். இதுகுறித்து வந்தவாசி வடக்கு போலீஸாா் விசாரணை மேற்கொண்டுள்ளனா்.