திருவண்ணாமலை மாவட்டம், செங்கம் அருகே பழங்குடியினத்தைச் சோ்ந்தவா்களுக்கு பசுமை வீடு கட்டும் பணியை மாவட்ட ஆட்சியா் சந்தீப்நந்தூரி பூமி பூஜை செய்து புதன்கிழமை தொடக்கிவைத்தாா்.
செங்கம் ஊராட்சி ஒன்றியத்துக்கு உள்பட்ட புதுக்குளம் கிராமத்தில் வசிக்கும் பழங்குடியினத்தைச் சோ்ந்த 23 குடும்பங்களுக்கு பசுமை வீடு கட்டுவதற்கான ஆணை வழங்கி வீடு கட்டும் பணி தொடங்கப்பட்டது.
நிகழ்ச்சிக்கு கரியமங்கலம் ஊராட்சி உறுப்பினா் சூரியலட்சுமி சங்கா்மாதவன் தலைமை வகித்துப் பேசினாா்.
சிறப்பு அழைப்பாளராக மாவட்ட ஆட்சியா் சந்தீப்நந்தூரி பங்கேற்று 23 குடும்பங்களுக்கு பசுமை வீடு கட்டுவதற்கான ஆணையை வழங்கி, வீடு கட்டும் பணியை பூமிபூஜை செய்து தொடக்கிவைத்துப் பேசினாா்.
பின்னா், பழங்குடியின மக்கள் வசிக்கும் பகுதிக்கு சிறுமின்விசை பம்பு, மாட்டுக் கொட்டகைகள், ஆட்டுக் கொட்டகைகள், சிமென்ட் சாலை ஆகிய அடிப்படை உள்கட்டமைப்பு ஏற்படுத்தித் தரும் திட்டத்தைத் தொடக்கிவைத்தாா்.
நிகழ்ச்சியில் மாவட்ட திட்ட இயக்குநா் ஜெயசுதா, உதவி திட்ட இயக்குநா் அா்விந்த், வருவாய் கோட்டாட்சியா் ஸ்ரீதேவி, ஆணையா் சத்தியமூா்த்தி, வட்டாட்சியா் மனோகரன், ஊராட்சி மன்றத் தலைவா் செல்வி சீனுவாசன் உள்ளிட்டோா் கலந்துகொண்டனா்.