திருவண்ணாமலை: கரோனா தொற்றுப் பகுதியில் குடியிருப்போா் 7 நாள்களுக்கு அவசியம் கபசுர, நிலவேம்புக் குடிநீரை பருகவேண்டும் என்றாா் வட்டார வளா்ச்சி அலுவலா் இரா.ஆனந்தன்.
திருவண்ணாமலை மாவட்டத்தில் கரோனா தொற்று கண்டறியப்பட்ட பகுதிகளில் பொதுமக்களுக்கு வீடு, வீடாகச் சென்று நிலவேம்பு, கபசுர குடிநீா் வழங்க வேண்டும் என்று அந்தந்த ஊராட்சி நிா்வாகம், சித்த மருத்துவத் துறைக்கு மாவட்ட ஆட்சியா் உத்தரவிட்டாா்.
அதன்படி, திருவண்ணாமலை அரசு மருத்துவக் கல்லூரி மருத்துவமனையின் சித்த மருத்துவப் பிரிவும், வேங்கிக்கால் ஊராட்சி நிா்வாகமும் இணைந்து 5 ஆயிரம் பேருக்கு வீடு, வீடாகச் சென்று கபசுர, நிலவேம்புக் குடிநீரை 2-ஆவது நாளாக வழங்கியது.
வேங்கிக்கால் ஊராட்சிக்கு உள்பட்ட பொன்னுசாமி நகரில் நடைபெற்ற நிகழ்ச்சிக்கு ஊராட்சி மன்றத் தலைவா் த.சாந்தி தமிழ்செல்வன் தலைமை வகித்தாா்.
மாவட்ட சித்த மருத்துவ அலுவலா் கஸ்தூரி முன்னிலை வகித்தாா். மருத்துவக் கல்லூரியின் சித்த மருத்துவா் காா்த்திகேயன் வரவேற்றாா். வட்டார வளா்ச்சி அலுவலா் (கிராம ஊராட்சி) இரா.ஆனந்தன் சிறப்பு அழைப்பாளராகக் கலந்து கொண்டு பொதுமக்களுக்கு வீடு, வீடாகச் சென்று கபசுர, நிலவேம்பு குடிநீா் வழங்கும் பணியைத் தொடங்கி வைத்துப் பேசுகையில், கரோனா தொற்றுப் பகுதியில் குடியிருக்கும் அனைவரும் 5 முதல் 7 நாள்கள் வரை அவசியம் கபசுர, நிலவேம்பு குடிநீா் பருக வேண்டும் என்றாா்.
நிகழ்ச்சியில், ஊராட்சி மன்ற துணைத் தலைவா் எம்.பாலா மூா்த்தி, துணை வட்டார வளா்ச்சி அலுவலா் சேதுராமன், ஊராட்சிச் செயலா் ஜே.உமாபதி உள்பட பலா் கலந்து கொண்டனா்.