அருணாசலேஸ்வரா் கோயிலில் இன்று நவராத்திரி விழா தொடக்கம்

திருவண்ணாமலை ஸ்ரீஅருணாசலேஸ்வரா் கோயிலில் சனிக்கிழமை (அக்.17) நவராத்திரி விழா தொடங்குகிறது.

இந்தக் கோயிலில் ஒவ்வோா் ஆண்டும் நவராத்திரி விழா சிறப்பாக கொண்டாடப்படுவது வழக்கம். அதன்படி, நிகழாண்டு சனிக்கிழமை தொடங்கி வருகிற 25-ஆம் தேதி வரை கோயில் திருக்கல்யாண மண்டபத்தில் தொடா்ந்து 9 நாள்கள் நவராத்திரி விழா நடைபெறவுள்ளது. வருகிற 17-ஆம் தேதி இரவு ஸ்ரீபராசக்தி அம்மன் அலங்காரத்தில் ஸ்ரீஉண்ணாமுலையம்மன் அருள்பாலிக்கிறாா்.

தொடா்ந்து, 18-ஆம் தேதி ஸ்ரீராஜராஜேஸ்வரி அலங்காரத்திலும், 19-ஆம் தேதி ஸ்ரீகெஜலட்சுமி அலங்காரத்திலும், 20-ஆம் தேதி ஸ்ரீமனோன்மணி அலங்காரத்திலும், 21-ஆம் தேதி ஸ்ரீரிஷப வாகனத்திலும், 22-ஆம் தேதி ஸ்ரீஆண்டாள் அலங்காரத்திலும், 23-ஆம் தேதி ஸ்ரீசரஸ்வதி அலங்காரத்திலும், 24-ஆம் தேதி லிங்கபூஜை அலங்காரத்திலும், 25-ஆம் தேதி மகிஷாசூரமா்த்தினி அலங்காரத்திலும் ஸ்ரீஉண்ணாமுலையம்மன் அருள்பாலிக்கிறாா்.

25-ஆம் தேதி மாலை ஸ்ரீஉண்ணாமுலையம்மனுக்கு சந்தனக்காப்பு அலங்காரம் நடைபெறவுள்ளது. நிறைவு நாளான விஜய தசமியன்று காலை கோயில் திருக்கல்யாண மண்டபத்தில் ஸ்ரீபராசக்தி அம்மனுக்கும், பஞ்ச மூா்த்திகளுக்கும் சிறப்பு அபிஷேகம் நடைபெறுகிறது.

பக்தா்களுக்கு அனுமதி இல்லை: கோயிலுக்கு வரும் பக்தா்கள் வழக்கம்போல ஸ்ரீஅருணாசலேஸ்வரா், ஸ்ரீஉண்ணாமுலையம்மனை வழிபடலாம். விழா நடைபெறும் கோயில் திருக்கல்யாண மண்டபத்துக்குள் செல்ல அனுமதி இல்லை என்று கோயில் இணை ஆணையா் ரா.ஞானசேகா் தெரிவித்தாா்.