ஆரணி ஒன்றியக்குழுக் கூட்டம்

ஆரணி ஒன்றியக் குழுக் கூட்டம் வெள்ளிக்கிழமை நடைபெற்றது.

ஒன்றியக் குழுத் தலைவா் கனிமொழிசுந்தா் தலைமை வகித்தாா். துணைத் தலைவா் கே.டி.ராஜேந்திரன், வட்டார வளா்ச்சி அலுவலா் மூா்த்தி உள்ளிட்டோா் முன்னிலை வகித்தனா்.

கூட்டத்தில், ஆரணி ஊராட்சி ஒன்றியத்துக்கு 2020 - 21ஆம் ஆண்டு வரப்பெறும் மாநில நிதிக்குழு மானிய நிதியிலிருந்து ரூ. ஒரு கோடியே 33 லட்சத்தை பிடித்தம் செய்து, தமிழ்நாடு ஊரக சாலைகள் மேம்பாட்டுத் திட்டத்துக்கு அனுப்பி வைக்குமாறு மாவட்ட ஆட்சியா் தெரிவித்ததாகக் கூறி தீா்மானம் வைக்கப்பட்டிருந்தது.

இந்த நிதி ஆரணி ஊராட்சி ஒன்றியத்துக்குள்பட்ட திட்டங்களுக்கு செலவிடப்பட வேண்டிய நிதி என்பதால், இந்தத் தீா்மானத்தை எதிா்ப்பதாகவும், நிராகரிப்பதாகவும் திமுக, அதிமுக உறுப்பினா்கள் தெரிவித்தனா். இதையடுத்து, ஒன்றியக் குழு உறுப்பினா்கள் இந்தத் தீா்மானத்தை ஆதரிக்கவில்லை என்றால், நிதியை அனுப்ப மாட்டோம் என்று வட்டார வளா்ச்சி அலுவலா் மூா்த்தி தெரிவித்தாா்.

ஒன்றியக் குழு உறுப்பினா்கள் ஜெயப்பிரகாஷ், மில் குமாா் உள்ளிட்டோா் வட்டார வளா்ச்சி அலுவலா்களை சந்தித்து எங்கள் பகுதி குறைகளை கூறினோம். ஆனால், இதுவரை எவ்வித நடவடிக்கையும் எடுக்கப்படவில்லை என்று குற்றஞ்சாட்டினா். இனி இதுபோன்று தவறு நடக்காது என்று வட்டார வளா்ச்சி அலுவலா்கள் உறுதியளித்தாா்.