அரசு மருத்துவா் மீது தாக்குதல்: ஆட்டோ ஓட்டுநா் கைது

திருவண்ணாமலை மாவட்டம், செய்யாறு அருகே ஆரம்ப சுகாதார நிலைய மருத்துவரை தாக்கியதாக ஆட்டோ ஓட்டுநரை போலீஸாா் வெள்ளிக்கிழமை கைது செய்தனா்.

வெம்பாக்கம் வட்டம், பெருங்கட்டூா் ஆரம்ப சுகாதார நிலையத்தில் மருத்துவராக பணியாற்றி வருபவா் வினோத்குமாா் (30). இவா், மாமண்டூா் நரசமங்கலம் தொழில்பேட்டை பகுதியில் வெள்ளிக்கிழமை நடைபெற்ற கரோனா சிறப்பு மருத்துவ முகாமை பாா்வையிட்டாா். பின்னா், நண்பகல் 12 மணியளவில் தனது பைக்கில் மாமண்டூா் நோக்கி சென்றுகொண்டிருந்தாா். தா்மாபுரம் இந்தியன் வங்கி அருகே சென்றபோது, இவரது பைக் மீது திடீரென சுமை ஆட்டோ ஒன்று மோதியதாகத் தெரிகிறது.

இதில், நிலைதடுமாறி கீழே விழுந்த மருத்துவா் வினோத்குமாா் பலத்த காயமடைந்தாா். இதுகுறித்து ஆட்டோ ஓட்டுநரிடம் அவா் தட்டிக் கேட்டபோது, இருவருக்கும் இடையே தகராறு ஏற்பட்டது. இதனால், ஆத்திரமடைந்த ஆட்டோ ஓட்டுநரான தா்மாபுரம் கிராமத்தைச் சோ்ந்த செல்வன் (22), மருத்துவா் வினோத்குமாரை சரமாரியாகத் தாக்கினாராம்.

இதையடுத்து, மருத்துவா் வினோத்குமாா் மாமண்டூா் ஆரம்ப சுகாதார நிலையத்தில் அனுமதிக்கப்பட்டாா். அவா் அளித்த புகாரின்பேரில், தூசி போலீஸாா் வழக்குப் பதிவு செய்து செல்வனை கைது செய்தனா்.