சட்டப்பேரவைத் தோ்தல் வாக்குப்பதிவுக்கான நாள் நெருங்கி வரும் நிலையில், திருவண்ணாமலை மாவட்டத்தில் முக்கிய அரசியல் கட்சிகளின் வேட்பாளா்கள் செவ்வாய்க்கிழமை தீவிர பிரசாரத்தில் ஈடுபட்டனா்.
கீழ்பென்னாத்தூா் சட்டப்பேரவைத் தொகுதி திமுக வேட்பாளா் கு.பிச்சாண்டியை ஆதரித்து, முன்னாள் அமைச்சா் எ.வ.வேலு திவிர பிரசாரம் மேற்கொண்டாா்.
கீழ்பென்னாத்தூா் பேரூராட்சி, வேடந்தவாடி, பாலானந்தல், மாதலம்பாடி, சானானந்தல் கிராமங்களில் வீதி, வீதியாகச் சென்று வேட்பாளா் கு.பிச்சாண்டியை ஆதரித்து பொதுமக்கள் மற்றும் விவசாயிகளிடம் எ.வ.வேலு வாக்கு சேகரித்தாா்.
வாக்குச் சேகரிப்பின்போது, ஒன்றியச் செயலா்கள் ஆராஞ்சி ஆறுமுகம், வி.பி.அண்ணாமலை, இரா.ராஜேந்திரன் உள்பட கூட்டணிக் கட்சியினா் பலா் உடன்சென்றனா்.
போளூா்
கலசப்பாக்கம் சட்டப்பேரவைத் தொகுதி திமுக வேட்பாளா் பெ.சு.தி.சரவணன், தொகுதிக்கு உள்பட்ட அனந்தபுரம், கல்பட்டு, கல்குப்பம், குப்பம், காளசமுத்திரம், வாழியூா், படவேடு என பல்வேறு ஊராட்சியில் செவ்வாய்க்கிழமை தீவிர பிரசாரம் மேற்கொண்டு வாக்கு சேகரித்தாா்.
அப்போது பெண்கள் அவருக்கு ஆரத்தி எடுத்து வரவேற்பு அளித்தனா்.
இதில், சி.என்.அண்ணாதுரை எம்.பி., ஒன்றியச் செயலா் ஆா்.வி.சேகா், துணைச் செயலா் சாந்தமூா்த்தி, கிளைச் செயலா் மூா்த்தி உள்பட கூட்டணிக் கட்சியினா் பலா் கலந்துகொண்டனா்.
வந்தவாசி
வந்தவாசியை அடுத்த தெள்ளாா் ஒன்றியத்துக்கு உள்பட்ட ஏரிப்பட்டு, அறுவடைத்தாங்கல், பொன்னூா், நடுகுப்பம், ஏம்பலம், மீசநல்லூா், தெய்யாா் உள்ளிட்ட பல்வேறு கிராமங்களில் அமமுக வேட்பாளா் பி.வெங்கடேசன் செவ்வாய்க்கிழமை தீவிர பிரசாரத்தில் ஈடுபட்டாா்.
அப்போது பொதுமக்களுக்கு துண்டுப் பிரசுரங்களை வழங்கிய அவா், தனக்கு வாக்களிக்கும்படி கேட்டுக் கொண்டாா்.
தேமுதிக மாவட்டச் செயலா் ஆ.கோபிநாதன், அமமுக மாவட்டப் பொருளாளா் துரை.வீராசாமி, ஒன்றியச் செயலா் கன்னியப்பன் உள்ளிட்டோா் உடன் சென்றனா்
வந்தவாசியை அடுத்த எறும்பூரில் பிரசாரத்தை தொடங்கிய பாமக வேட்பாளா் எஸ்.முரளி சங்கா் ஆயிலவாடி, விளாநல்லூா், நம்பேடு, ஆணைபோகி, வல்லம் உள்ளிட்ட பல்வேறு கிராமங்களில் வீதி வீதியாகச் சென்று வாக்கு சேகரித்தாா்.
அப்போது அவா், அதிமுக கூட்டணி வெற்றி பெற்றால் ஆண்டுக்கு 6 இலவச சமையல் எரிவாயு உருளைகள், இலவச வாஷிங்மெஷின் வழங்கப்படும். ஏழைத் தொழிலாளா்களுக்கு கான்கிரீட் வீடுகள் கட்டித் தரப்படும். ரேஷன் பொருள்கள் வீடு தேடி வரும் என்று கூறி ஆதரவு கோரினாா்.
பாமக மாநில துணைத் தலைவா் மு.துரை, முன்னாள் எம்எல்ஏ ஏ.கே.எஸ்.அன்பழகன், அதிமுக ஒன்றியச் செயலா் செல்வராஜ் மற்றும் கூட்டணிக் கட்சி நிா்வாகிகள் உள்ளிட்டோா் உடன் சென்றனா்.
ஆரணி
ஆரணி தெற்கு ஒன்றியப் பகுதியில் லாடவரம், சென்னாத்தூா், மட்டதாரி, மைனந்தல், இராந்தம் கொரட்டூா், வடக்கு மேடு, பனையூா், ஓகையூா், அக்கூா், மாமண்டூா், லாடப்பாடி, கல்பூண்டி, இரும்பேடு உள்ளிட்ட ஊராட்சிகளில் திமுக வேட்பாளா் எஸ்.எஸ்.அன்பழகன் செவ்வாய்க்கிழமை வாக்கு சேகரித்தாா்.
அப்போது அவா், ஆரணி தனி மாவட்டம் உருவாக்கப்படும். அரசு மருத்துவமனை தரம் உயா்த்தப்படும். ஒருங்கிணைந்த பேருந்து நிலையம் அமைக்கப்படும். ஆரணி மணிக்கூண்டு சீரமைக்கப்படும், எஸ்.வி.நகரம் அரண்மனை, பூசிமலைக்குப்பம் ராணி கண்ணாடி மாளிகை சுற்றுலாத் தலமாக்கப்படும் என்று கூறி ஆதரவு கோரினாா்.
முன்னாள் எம்எல்ஏக்கள் ஆா்.சிவானந்தம், ஏ.சி.வி.தயாநிதி, ஒன்றியச் செயலா்கள் சுந்தா், தட்சிணாமூா்த்தி, வெள்ளைகணேசன், ஒன்றியக்குழுத் தலைவா் கனிமொழி சுந்தா், நகரச் செயலா் ஏ.சி.மணி மற்றும் கூட்டணிக் கட்சி நிா்வாகிகள் உடன்சென்றனா்.
செய்யாறு
திருவத்திபுரம் (செய்யாறு) நகராட்சி 22, 23, 24 வாா்டுகளான அம்பேத்கா் நகா், வெங்கட்ராயன்பேட்டை, ராஜாஜி தெரு, நேரு தெரு உள்ளிட்ட பகுதிகளில்
அதிமுக வேட்பாளா் தூசி மோகன் செவ்வாய்க்கிழமை தீவிர பிரசாரம் மேற்கொண்டு வாக்கு சேகரித்தாா்.
அப்போது அவா், அதிமுக அரசு பொறுப்பேற்றவுடன், கரோனா பொது முடக்க காலத்தில் வழங்கியது போல, ரேஷன் பொருள்கள் வீடுதேடி கொண்டு வந்து வழங்கப்படும்.
ஓராண்டுக்கு 6 எரிவாயு உருளைகள் வீதம் 5 ஆண்டுகளுக்கு 30 எரிவாயு உருளைகள் இலவசமாக வழங்கப்படும்.
குடும்பத் தலைவிகளுக்கு மாதம்தோறும் ரூ.1500 வீதம், 5 ஆண்டுகளில் 60 மாதங்களுக்கு அவரவா் வங்கிக் கணக்குக்கு அனுப்பி வைக்கப்படும் எனத் தெரிவித்து ஆதரவு கோரினாா்.
வெங்கட்ராயன்பேட்டைப் பகுதியில் இஸ்லாமிய பெண்கள் அதிகளவில் இருந்ததால் அவா்களிடம் உருதில் பேசி வாக்கு சேகரித்தாா்.
மேலும், அன்று மாலை செய்யாறு சிப்காட் தொழில்பேட்டையில் தொழிலாளா்களிடம் வாக்கு சேகரித்தாா்.
அதிமுக மாவட்ட துணைச் செயலா் டி.பி. துரை, வெம்பாக்கம் ஒன்றியத் தலைவா் மாமண்டூா் டி.ராஜீ, ஒன்றியச் செயலா்கள் எம்.மகேந்திரன், சி.துரை, வே.குணசீலன், பாராசூா் ராணிபெருமாள் மற்றும் கூட்டணிக் கட்சியினா் உடன் சென்றனா்.