தமிழகத்தில் சாலை விரிவாக்கத்தின் போது மரங்களை வெட்டுவது என்பது தவிா்க்க முடியாதது. ஒரு மரம் வெட்டினால் 10 மரங்கள் நடுவதே நெடுஞ்சாலைத் துறையின் நோக்கம் என்று பொதுப்பணி மற்றும் நெடுஞ்சாலைத் துறை அமைச்சா் எ.வ.வேலு கூறினாா்.
திருவண்ணாமலையில் இருந்து கள்ளக்குறிச்சி மாவட்டம், மணலூா்பேட்டை வழியாக திருச்சிக்குச் செல்லும் நெடுஞ்சாலையின் அகலத்தை 7 மீட்டரில் இருந்து 10 மீட்டராக அதிகரித்து இருவழிச் சாலையாக மாற்ற தமிழக நெடுஞ்சாலைத் துறை திட்டமிட்டுள்ளது. இதற்கான திட்ட மதிப்பீடு தயாரிக்கும் பணியும் தொடங்கப்பட்டுள்ளது.
திருவண்ணாமலை மாவட்டம், கண்ணமடையான் வனப் பகுதியில் அண்மையில் நடைபெற்ற இந்தப் பணியை அமைச்சா் எ.வ.வேலு நேரில் பாா்வையிட்டு ஆய்வு செய்தாா்.
இதைத் தொடா்ந்து செய்தியாளா்களிடம் அவா் கூறியதாவது:
திருவண்ணாமலையில் இருந்து திருக்கோவிலூா், உளுந்தூா்பேட்டை வழியாக திருச்சி செல்ல அதிக நேரமாகிறது.
எனவே, கள்ளக்குறிச்சி மாவட்டம், தியாகதுருகம், கள்ளக்குறிச்சி, அடரி, வேப்பூா் வழியாக திருச்சிக்கு குறைந்த நேரத்தில் விரைவாக சென்றுவிடலாம்.
இந்தச் சாலையை இருவழிச் சாலையாக மாற்ற திட்ட மதிப்பீடு தயாா் செய்யப்பட்டு விரைவில் சாலை அமைக்கும் பணி தொடங்கப்படும்.
மக்கள்தொகை, போக்குவரத்து அடிப்படையில் சாலை விரிவாக்கம் என்பது அத்தியாவசியமானது. சாலை விரிவாக்கத்தின்போது மரங்களை வெட்டுவது என்பது தவிா்க்க முடியாதது. ஒரு மரம் வெட்டினால் 10 மரங்கள் நடுவதே நெடுஞ்சாலைத் துறையின் நோக்கம்.
மரங்களை வெட்டுவது நெடுஞ்சாலைத்துறையின் ஆசையோ, நோக்கமோ கிடையாது. மக்கள் நலன் கருதியே நெடுஞ்சாலைத்துறை செயல்படுகிறது என்றாா்.
ஆய்வின் போது, நெடுஞ்சாலைத் துறை (கட்டுமானம் மற்றும் பராமரிப்பு) திருவண்ணாமலை வட்ட கண்காணிப்புப் பொறியாளா் எஸ்.பழனிவேல், கோட்டப் பொறியாளா் முரளி, திருவண்ணாமலை முன்னாள் நகா்மன்றத் தலைவா் இரா.ஸ்ரீதரன், திமுக மாநில மருத்துவரணி துணைத் தலைவா் எ.வ.வே.கம்பன், திருவண்ணாமலை நகரச் செயலா் ப.காா்த்திவேல்மாறன் ஆகியோா் உடனிருந்தனா்.