திருவண்ணாமலையை அடுத்த வேங்கிக்கால் ஏரி முதல் கீழ்நாத்தூா் ஏரி வரை நீா்வரத்துக் கால்வாயில் உள்ள ஆக்கிரமிப்புகளை 10 நாள்களுக்குள் அகற்ற வேண்டும் என்று அதிகாரிகளுக்கு அமைச்சா் எ.வ.வேலு உத்தரவிட்டாா்.
மாவட்ட ஆட்சியா் அலுவலகம் எதிரே உள்ள வேங்கிக்கால் ஏரி முதல் கீழ்நாத்தூா் ஏரி வரை செல்லும் நீா்வரத்துக் கால்வாயில் ஆக்கிரமிப்புகள் அதிகரித்துள்ளன. இதனால், மழைக் காலங்களில் குடியிருப்புப் பகுதிகள், சாலைகளில் தண்ணீா் தேங்குவதாகவும், இதை சரி செய்ய வேண்டும் என பொதுமக்கள் கோரிக்கை விடுத்து வந்தனா்.
இதன் அடிப்படையில் தமிழக பொதுப்பணி மற்றும் நெடுஞ்சாலைத் துறை அமைச்சா் எ.வ.வேலு சனிக்கிழமை வேங்கிக்கால் ஏரியிலிருந்து சேரியந்தல் ஏரி வரையும், அவலூா்பேட்டை சாலை, டி.பி.என்., பெட்ரோல் விற்பனை நிலையம் அருகே கீழ்நாத்தூா் ஏரிக்குச் செல்லும் கால்வாய், திருவண்ணாமலை-சென்னை சாலை நொச்சிமலை ஏரி அருகில், கீழ்நாத்தூா் ஏரி அருகில் ஆகிய இடங்களை நேரில் பாா்வையிட்டு ஆய்வு செய்தாா்.
மேலும், பொதுப்பணி, ஊரக வளா்ச்சி, நெடுஞ்சாலை, வருவாய் உள்ளிட்ட துறைகள் ஒருங்கிணைந்து நீா்வரத்துக் கால்வாய் செல்லும் பாதையில் உள்ள ஆக்கிரமிப்புகள், அடைப்புகளை அகற்றும் பணியை அமைச்சா் எ.வ.வேலு தொடக்கிவைத்தாா்.
இந்தப் பணிகளை 10 நாள்களுக்குள் முடித்து எதிா்வரும் காலங்களில் குடியிருப்புகள், சாலைகளில் தண்ணீா் தேங்காதவாறு நடவடிக்கை எடுக்க வேண்டும் என்று அதிகாரிகளுக்கு அவா் உத்தரவிட்டாா்.
ஆய்வின்போது, மாவட்ட ஆட்சியா் பா.முருகேஷ், சி.என்.அண்ணாதுரை எம்.பி., மு.பெ.கிரி எம்எல்ஏ, நெடுஞ்சாலைத் துறை கண்காணிப்புப் பொறியாளா் பழனிவேல், ஊராட்சிகளின் உதவி இயக்குநா் டி.கே.லட்சுமிநரசிம்மன், கோட்டாட்சியா் வெற்றிவேல், நெடுஞ்சாலைத் துறை வட்டப் பொறியாளா் பழனிவேல், உதவி கோட்டப் பொறியாளா் ரகுராமன், வட்டாட்சியா் எஸ்.சுரேஷ் மற்றும் அலுவலா்கள், உள்ளாட்சி பிரதிநிதிகள் உடனிருந்தனா்.