ஊராட்சி துணைத் தலைவா் கைது: கிராம மக்கள் சாலை மறியல்

செய்யாறு அருகே கைது செய்யப்பட்ட ஊராட்சி மன்ற துணைத் தலைவரை விடுவிக்கக் கோரி, கிராம மக்கள் செவ்வாய்க்கிழமை சாலை மறியலில் ஈடுபட்டனா்.

திருவண்ணாமலை மாவட்டம், வெம்பாக்கம் வட்டம், செல்லப்பெரும்புலிமேடு கிராமத்தைச் சோ்ந்தவா் சேகா் (35). இவா், ஊராட்சி மன்ற துணைத் தலைவராக பதவி வகித்து வருகிறாா். இவா் மீது கடந்த மாதம் செப்.22-ஆம் தேதி மாங்கால் கூட்டுச் சாலையில் உள்ள பழ வியாபாரி மணிகண்டன் அளித்த புகாரின் பேரில், செப்.25-ஆம் தேதி தூசி போலீஸாா் கைது செய்து சிறையில் அடைத்தனா்.

இந்த நிலையில், சிறையில் உள்ள சேகா் மீது குண்டா் தடுப்புச் சட்டத்தின் கீழ் நடவடிக்கை எடுக்க போலீஸாா் பரிந்துரை செய்ததாகத் தெரிகிறது.

இதை அறிந்த செல்லப்பெரும்புலிமேடு கிராம மக்கள் சுமாா் 100-க்கும் மேற்பட்டோா் செய்யாறு-காஞ்சிபுரம் சாலையில் சாலை மறியலில் ஈடுபட்டனா்.

அப்போது பொய் வழக்கில் கைது செய்யப்பட்டுள்ள ஊராட்சி மன்ற துணைத் தலைவா் சேகரை விடுவிக்க வேண்டும், குண்டா் தடுப்புச் சட்டத்தை ரத்து செய்யவேண்டும் என வலியுறுத்தி முழக்கமிட்டு மறியலில் ஈடுபட்டனா்.

தகவல் அறிந்த செய்யாறு டி.எஸ்.பி செந்தில் காவல் ஆய்வாளா் (பொ) பாலு மற்றும் தூசி போலீஸாா் சம்பவ இடம் சென்று சாலை மறியலில் ஈடுபட்டவா்களிடம் பேச்சுவாா்த்தை நடத்தினா்.

அப்போது, மறியலில் ஈடுபட்டவா்களிடம் கோரிக்கை குறித்து உயா் அதிகாரிகளிடம் மனுவாக கொடுங்கள் என போலீஸாா் அறிவுறுத்தினா்.

அதன் பேரில் சமாதானம் அடைந்த கிராம மக்கள் சாலை மறியலை கைவிட்டு கலைந்து சென்றனா்.