திருவண்ணாமலை அருணாசலேஸ்வரா் கோயிலுக்கு ஒரு மாதத்தில் ரூ.1.78 கோடி ரொக்கம், 363 கிராம் தங்கம், 1109 கிராம் வெள்ளியை பக்தா்கள் காணிக்கையாக செலுத்தி இருந்தனா்.
அருணாசலேஸ்வரா் கோயிலுக்கு தினமும் ஏராளமான பக்தா்கள் வந்து செல்கின்றனா். எனவே, பக்தா்கள் செலுத்தும் காணிக்கை பணத்தை எண்ணும் பணி மாதம்தோறும் நடைபெற்று வருகிறது. அதன்படி, வியாழக்கிழமை உண்டியல் காணிக்கை எண்ணும் பணி கோயில் இணை ஆணையா் அசோக்குமாா் தலைமையில் நடைபெற்றது.
100-க்கும் மேற்பட்ட கோயில் ஊழியா்கள், தன்னாா்வலா்கள் காலை முதல் இரவு வரை உண்டியல் காணிக்கை எண்ணும் பணியில் ஈடுபட்டனா்.
அருணாசலேஸ்வரா் கோயிலில் உள்ள உண்டியல்கள், கிரிவலப் பாதை அஷ்டலிங்க சன்னதிகளில் உள்ள உண்டியல்களில் இருந்த காணிக்கை எண்ணப்பட்டது.
இதில் ரூ. ஒரு கோடியே 78 லட்சத்து 89 ஆயிரத்து 35 ரொக்கம், 363 கிராம் தங்கம், 1109 கிராம் வெள்ளியை பக்தா்கள் காணிக்கையாக செலுத்தி இருந்தது தெரியவந்தது.