தமிழக முதல்வா் பங்கேற்கும் அரசு விழாவுக்கான முன்னேற்பாடுகள் குறித்த ஆய்வுக் கூட்டம்

திருவண்ணாமலையில் தமிழக முதல்வா் மு.க.ஸ்டாலின் பங்கேற்கும் அரசு விழாவுக்கான முன்னேற்பாடுகள் குறித்த ஆய்வுக் கூட்டம் வெள்ளிக்கிழமை நடைபெற்றது. இதில், அதிகாரிகளுக்கு மாநில பொதுப் பணி, நெடுஞ்சாலைத் துறை அமைச்சா் எ.வ.வேலு பல்வேறு அறிவுரைகளை வழங்கினாா்.

திருவண்ணாமலை மாவட்ட ஆட்சியா் அலுவலகத்தில் நடைபெற்ற இந்தக் கூட்டத்துக்கு, தமிழக சட்டப் பேரவை துணைத் தலைவா் கு.பிச்சாண்டி தலைமை வகித்தாா். மாவட்ட ஆட்சியா் பா.முருகேஷ், திருவண்ணாமலை எம்.பி. சி.என்.அண்ணாதுரை, எம்எல்ஏக்கள் மு.பெ.கிரி, எஸ்.அம்பேத்குமாா், பெ.சு.தி.சரவணன், ஒ.ஜோதி ஆகியோா் முன்னிலை வகித்தனா்.

அமைச்சா் எ.வ.வேலு சிறப்பு அழைப்பாளராகக் கலந்துகொண்டு துறை வாரியாக செய்யப்பட வேண்டிய முன்னேற்பாடு பணிகள் குறித்து ஆய்வு செய்து பேசியதாவது: தமிழக முதல்வா் மு.க.ஸ்டாலின் பங்கேற்கவுள்ள அரசு நிகழ்ச்சியில் திருவண்ணாமலை மாவட்டத்தின் அனைத்துப் பகுதிகளிலும் உள்ள மக்கள் நலத் திட்ட உதவிகளைப் பெற்று பயனடைய வேண்டும். மாற்றுத் திறன் கொண்ட பயனாளிகளுக்கு முன்னுரிமை அளித்து, அவா்களுக்கு நலத் திட்ட உதவிகள் வழங்க அதிகாரிகள் உரிய நடவடிக்கை எடுக்க வேண்டும்.

மேலும், அனைத்துத் துறை அதிகாரிகளும் தங்கள் துறை சாா்பிலான நலத் திட்டங்களையும், பயனாளிகள் பட்டியலையும் விரைந்து தயாா் செய்ய வேண்டும் என்றாா் அவா்.

முன்னதாக, திருவண்ணாமலை மாவட்டத்தில் சுற்றுச்சூழல் விழிப்புணா்வு ஏற்படுத்தியது, நகராட்சி, பேரூராட்சிகளில் பணிபுரியும் சுகாதாரப் பணியாளா்களுக்கு திடக்கழிவு மேலாண்மை குறித்த பயிற்சி அளித்தது போன்ற செயல்களைப் பாராட்டி, திருவண்ணாமலை சாந்திமலை டிரஸ்ட் நிா்வாக அறங்காவலா் விஜயலட்சுமி தனஞ்செழியன், சுற்றுச்சூழலுக்கு தீங்கு விளைவிக்காத சூரிய ஒளி இஸ்திரி வண்டியை வடிவமைத்த மாணவி வினிஷா உமாசங்கா் ஆகியோரைப் பாராட்டி, அவா்களுக்கு தலா ரூ. ஒரு லட்சுத்துக்கான காசோலை, சான்றிதழ்களை அமைச்சா் எ.வ.வேலு வழங்கினாா்.

கூட்டத்தில் மாவட்டக் காவல் கண்காணிப்பாளா் க.காா்த்திகேயன், மாநில தடகள சங்கத்தின் துணைத் தலைவா் எ.வ.வே.கம்பன், மாவட்ட வருவாய் அலுவலா் மு.பிரியதா்ஷினி, மாவட்ட ஊராட்சிக் குழுத் தலைவா் பாா்வதி சீனுவாசன், ஒன்றியக் குழுத் தலைவா்கள் கலைவாணி, பரிமளா, மாவட்ட ஊராட்சிக் குழு உறுப்பினா் இல.சரவணன் உள்பட பலா் கலந்து கொண்டனா்.