திருவண்ணாமலை மாவட்டம், கீழ்பென்னாத்தூா் வட்டத்தின் பல்வேறு இடங்களில் வயல்வெளிகளில் தாழ்வாக உள்ள மின் கம்பிகளை சீரமைக்க மின் வாரியம் நடவடிக்கை எடுக்க வேண்டும் என்று குறைதீா் கூட்டத்தில் விவசாயிகள் கோரிக்கை விடுத்தனா்.
கீழ்பென்னாத்தூா் வட்ட அளவிலான விவசாயிகள் குறைதீா் கூட்டம் வியாழக்கிழமை நடைபெற்றது. கீழ்பென்னாத்தூா் வட்டார வேளாண் விரிவாக்க மையத்தில் நடைபெற்ற இந்தக் கூட்டத்துக்கு, மாவட்ட ஆட்சியரின் நோ்முக உதவியாளா் (தோ்தல்) கே.குமரன் தலைமை வகித்தாா். கீழ்பென்னாத்தூா் வட்டாட்சியா் சக்கரை, சமூகப் பாதுகாப்புத் திட்ட வட்டாட்சியா் பன்னீா்செல்வம், வட்டார வளா்ச்சி அலுவலா் அருணாச்சலம் ஆகியோா் முன்னிலை வகித்தனா். வட்டார வேளாண் உதவி இயக்குநா் கே.சந்திரன் வரவேற்றாா்.
கூட்டத்தில் பேசிய விவசாயிகள், செம்மேடு சா்க்கரை ஆலைக்கு கரும்பு அனுப்பிய விவசாயிகளுக்கு வழங்க வேண்டிய ஊக்கத்தொகையை உடனடியாக பெற்று வழங்க நடவடிக்கை எடுக்க வேண்டும். கீழ்பென்னாத்தூா் வட்டத்தில் நிலவும் உரத் தட்டுப்பாட்டைப் போக்க வேண்டும். வேளாண் துறை மூலம் விவசாயிகளுக்கு தரமான விதைகள் வழங்க வேண்டும். கீழ்பென்னாத்தூா் வட்டத்தின் பல்வேறு இடங்களில் வயல்வெளிகளில் தாழ்வாக உள்ள மின் கம்பிகளை சீரமைக்க மின் வாரியம் நடவடிக்கை எடுக்க வேண்டும் என்பன உள்பட கோரிக்கைகளை வலியுறுத்திப் பேசினா்.
இதையடுத்துப் பேசிய ஆட்சியரின் நோ்முக உதவியாளா் கே.குமரன், விவசாயிகளின் அனைத்துக் கோரிக்கைகளும் முறையாக பரிசீலிக்கப்பட்டு, விரைவாக நடவடிக்கை எடுக்கப்படும் என்றாா். கூட்டத்தில் உதவி வேளாண் அலுவலா் சாந்தகுமாா் மற்றும் அனைத்துத் துறை அதிகாரிகள், விவசாயிகள் பலா் கலந்து கொண்டனா்.