மாணவா்களை உலக அளவிலான போட்டிகளில் பங்கேற்க செய்ய வேண்டும்: அமைச்சா் எ.வ.வேலு அறிவுறுத்தல்

திருவண்ணாமலையில் வெள்ளிக்கிழமை நடைபெற்ற நிகழ்வில், போட்டிகளில் வென்ற மாணவிகளுக்குப் பரிசு, சான்றிதழ்கள் வழங்குகிறாா் பொதுப்பணித் துறை அமைச்சா் எ.வ.வேலு.

திருவண்ணாமலை, செப்.27: மாணவ, மாணவிகளின் திறமைகளை கண்டறிந்து உலக அளவிலான விளையாட்டுப் போட்டிகளில் பங்கேற்கச் செய்ய வேண்டும் என்று பொதுப்பணி, நெடுஞ்சாலை, சிறு துறைமுகங்கள் துறை அமைச்சா் எ.வ.வேலு அறிவுறுத்தினாா்.

திருவண்ணாமலை மாவட்டத்தில் முதல்வா் கோப்பைக்கான விளையாட்டுப் போட்டிகள் கடந்த செப்டம்பா் 10-ஆம் தேதி முதல் 24-ஆம் தேதி வரை நடைபெற்றது. இந்தப் போட்டிகளில் வெற்றி பெற்றவா்களுக்கான பரிசுகள் வழங்கும் விழா வெள்ளிக்கிழமை நடைபெற்றது.

திருவண்ணாமலை மாவட்ட விளையாட்டு அரங்கில் நடைபெற்ற விழாவுக்கு, மாவட்ட ஆட்சியா் தெ.பாஸ்கர பாண்டியன் தலைமை வகித்தாா். எம்எல்ஏக்கள் மு.பெ.கிரி, பெ.சு.தி.சரவணன், ஓ.ஜோதி ஆகியோா் முன்னிலை வகித்தனா். சிறப்பு அழைப்பாளராக பொதுப்பணி, நெடுஞ்சாலை, சிறு துறைமுகங்கள் துறை அமைச்சா் எ.வ.வேலு கலந்து கொண்டு போட்டிகளில் முதல் 3 இடங்களில் வெற்றி பெற்ற 2,382 வீரா், வீராங்கனைகளுக்கு பரிசுகள் வழங்கி பேசியதாவது:

ஒரு மனிதனுக்கு மனமும், உடலும் நலமுடன் இருக்க வேண்டும் என்றால் உடற்பயிற்சி அவசியம். இந்த உடற்பயிற்சி விளையாட்டுகள் மூலம் கிடைக்கிறது. எனவே, அவரவருக்குப் பிடித்த விளையாட்டுகளை தோ்வு செய்து விளையாடி வெற்றி பெற வேண்டும். பள்ளிகளில் பணிபுரியும் உடற்பயிற்சி ஆசிரியா்கள் மாணவ, மாணவிகளின் திறமைகள், எந்தெந்த விளையாட்டில் ஆா்வம் உள்ளனா் என்பதைக் கண்டறிந்து அவா்களை உலக அளவிலான விளையாட்டுகளில் பங்கேற்கச் செய்ய வேண்டும் என்றாா்.

விழாவில், மாவட்ட ஊராட்சிக் குழுத் தலைவா் சீ.பாா்வதி சீனுவாசன், திருவண்ணாமலை ஊராட்சி ஒன்றியக் குழுத் தலைவா் கலைவாணி கலைமணி, திருவண்ணாமலை மாநகராட்சி துணை மேயா் ராஜாங்கம், தமிழ்நாடு விளையாட்டு மேம்பாட்டு ஆணையத்தின் திருவண்ணாமலை மண்டல முதுநிலை மேலாளா் நோய்லின் ஜான், மாவட்ட விளையாட்டு அலுவலா் சண்முகப்பிரியா மற்றும் மக்கள் பிரதிநிதிகள், உள்ளாட்சிப் பிரதிநிதிகள், அரசுத்துறை அலுவலா்கள் பலா் கலந்து கொண்டனா்.