சாலைப் பள்ளத்தில் சிக்கிய லாரி

திருப்பத்தூரில் சாலைப் பள்ளத்தில் லாரி சிக்கி விபத்துக்குள்ளானது.
திருப்பத்தூரில் தருமபுரி-கிருஷ்ணகிரி பிரதான சாலையில் நெடுஞ்சாலைத் துறை சார்பில் சிறுபாலம் கட்டும் பணி நடைபெற்று வருகிறது. இந்நிலையில், வெள்ளிக்கிழமை ஜல்லிக் கற்கள் ஏற்றி வந்த லாரி, திடீரென சாலையில் ஏற்பட்ட பள்ளத்தில் சிக்கி விபத்துக்குள்ளானது. 
இதில், அதிர்ஷ்டவசமாக யாருக்கும் காயம் ஏற்படவில்லை. கடந்த 2 நாள்களாக பெய்த மழையால் இந்தப் பள்ளம் ஏற்பட்டிருக்கலாம் எனக் கூறப்படுகிறது. 
இதேபகுதியில் கடந்த 6 மாதங்களுக்கு முன்பும், கிருஷ்ணகிரி சாலையில் 3 மாதங்களுக்கு முன்பும் சாலையில் ஏற்பட்ட திடீர் பள்ளத்தில் லாரி சிக்கி விபத்துக்குள்ளானது குறிப்பிடத்தக்கது.
எனவே, இனிவரும் காலங்களில் சாலைகள் அமைக்கும்போது தரமான முறையில் அமைத்து, விபத்துக்கள் ஏற்படுவதைத் தவிர்க்க நெடுஞ்சாலைத் துறையினர் நடவடிக்கை எடுக்க வேண்டும் என சமூக ஆர்வலர்கள் எதிர்பார்க்கின்றனர்.