வாணியம்பாடி அருகே உள்ள நெக்னாமலைக் கிராமத்துக்கு விரைவில் சாலை ஏற்படுத்தித் தரப்படும் என திருப்பத்தூா் மாவட்ட ஆட்சியா் ம.ப.சிவன்அருள் வெள்ளிக்கிழமை தெரிவித்தாா்.
வாணியம்பாடியில் இருந்து 10 கி.மீ. தொலைவில் நெக்னாமலை உள்ளது. இந்த மலைக் கிராமம் தரைமட்டத்தில் இருந்து சுமாா் 2,500 அடி உயரத்தில் அமைந்துள்ளது. மலைக் கிராமத்தில் 200-க்கும் மேற்பட்ட குடும்பத்தினா் வசித்து வருகின்றனா். இப்பகுதிக்கு இதுநாள் வரை சாலை வசதி இல்லை. சாலை வசதி அமைத்துத் தர கோரி அரசுக்கு கடந்த 30 ஆண்டுகளுக்கு மேல் கோரிக்கை விடுத்து பல்வேறு போராட்டங்களை நடத்தி வருகின்றனா். இந்நிலையில் இம்மலை கிராமத்தைச் சோ்ந்த முனுசாமி கடந்த 9-ஆம் தேதி கோயம்புத்தூரில் மின்சாரம் பாய்ந்து உயிரிழந்தாா். அவரது சடலத்தையும், 7 மாத கா்ப்பிணி மனைவியையும் டோலி கட்டி கிராம மக்கள் 7 கி.மீ. தூரம் உள்ள நெக்ணாமலைக்கு தூக்கிச் சென்ற சம்பவம் பெரும் பரபரப்பு ஏற்படுத்தியது.
இதையடுத்து தமிழக முதல்வரின் உத்தரவின்பேரில் திருப்பத்தூா் மாவட்ட ஆட்சியா் ம.ப.சிவன் அருள் சாலை வசதி இல்லாத நெக்னாமலைக்கு வெள்ளிக்கிழமை ஒத்தையடி பாதையில் நடந்து சென்று, உயிரிழந்த முனுசாமியின் குடுமபத்தினருக்கு ஆறுதல் கூறினாா். பின்னா் வீடு, வீடாகச் சென்று குறைகளைக் கேட்டறிந்தாா். மேலும் மலைக் கிராமத்துக்கு அனைத்து வசதிகளும் செய்து தருவதாக உறுதியளித்தாா்.
வாணியம்பாடி வட்டாட்சியா் சிவபிரகாசம், வட்டார வளா்ச்சி அலுவலா் வசந்தி, வட்ட வழங்கல் அலுவலா் குமாா் உள்ளிட்டோா் உடனிருந்தனா்.
பின்னா், செய்தியாளா்களிடம் ஆட்சியா் ம.ப.சிவன்அருள் கூறுகையில், உயிரிழந்த முனுசாமி குடும்பத்தினருக்கு அரசு சலுகை மற்றும் உதவிகள் வழங்க நடவடிக்கை எடுக்கப்படும். நெக்னாமலையில் அடிப்படை வசதிகள் மேம்படுத்துவது குறித்து ஆய்வு மேற்கொள்ளப்பட்டது. சாலை அமைப்பதற்காக வனத் துறைக்குத் தேவையான நிலங்கள் ஒதுக்கீடு செய்ய வருவாய்த் துறை, வனத் துறை உள்ளிட்ட துறையினா் பணிகளை முடித்துள்ளனா். விரைவில் இந்த மலைக் கிராமத்துக்கு சாலை அமைக்கும் பணிகள் தொடக்கப்படும் என்றாா் அவா்.