காட்பாடி அருகே ஏரியில் இருந்து அழுகிய நிலையில் ஆண் சடலம் ஒன்று மீட்கப்பட்டுள்ளது. உயிரிழந்தவர் யார் என்பது குறித்தும், இது கொலையா என்ற அடிப்படையிலும் திருவலம் போலீஸார் வழக்குப்பதிவு செய்து விசாரணை மேற்கொண்டு வருகின்றனர்.
காட்பாடி அருகே கொண்டேரிப்பள்ளம் எனும் ஏரியில் இருந்து ஞாயிற்றுக்கிழமை கடுமையான துர்நாற்றம் வீசியதை அறிந்த அப்பகுதி மக்கள், ஏரியை பார்வையிட்டனர். அப்போது, ஏரியிலுள்ள தேங்கிய தண்ணீரில் உடல் அழுகிய நிலையில் ஆண் சடலம் கிடந்தது தெரியவந்தது.
உடனடியாக திருவலம் காவல் நிலையத்துக்கு தகவல் தெரிவிக்கப்பட்ட நிலையில், போலீஸார் விரைந்து வந்து சடலத்தை கைப்பற்றி விசாரணை நடத்தி வருகின்றனர். இதுவரை இறந்தவர் யார் என்ற விவரம் தெரியவில்லை. உடலில் காயங்கள் இருந்ததால் அவர் கொலை செய்யப்பட்டு சடலத்தை வீசியிருக்கலாம் என போலீஸார் சந்தேகிக்கின்றனர். சடலத்தை கைப்பற்றி பிரேத பரிசோதனைக்காக அடுக்கம்பாறை அரசு மருத்துவமனைக்கு அனுப்பி வைத்தனர். மேலும், இச்சம்பவம் குறித்து போலீஸார் வழக்குப்பதிவு செய்து மேலும் விசாரணை நடத்தி வருகின்றனர்.