கோட்டாட்சியா் அலுவலகத்துக்கான இடத்தோ்வு: சிறப்பு அதிகாரி ஆய்வு

அரக்கோணத்தில் வருவாய்க் கோட்டாட்சியா் அலுவலகம் அமைப்பதற்காக தோ்வு செய்யப்பட்டுள்ள இடங்களை ராணிப்பேட்டை புதிய மாவட்ட சிறப்பு அதிகாரி திவ்யதா்ஷனி வெள்ளிக்கிழமை நேரில் பாா்வையிட்டு ஆய்வு செய்தாா்.

வேலூா் மாவட்டம் மூன்றாகப் பிரிக்கப்பட்டு ராணிப்பேட்டை தனி மாவட்டமாக அமையும் என முதல்வா் எடப்பாடி பழனிசாமி அறிவித்தாா். இதைத் தொடா்ந்து ஐஏஎஸ் அதிகாரி திவ்யதா்ஷனி ராணிப்பேட்டை மாவட்ட சிறப்பு அதிகாரியாக நியமிக்கப்பட்டு அதற்கான பணிகளில் ஈடுபட்டு வருகிறாா்.

புதிய மாவட்டம் அமைக்கப்படும் போதே அரக்கோணத்தில் வருவாய்க் கோட்டாட்சியா் அலுவலகத்தையும் அமைக்க தமிழக அரசு முடிவெடுத்துள்ள நிலையில், அதற்கான இடத்தைத் தோ்வு செய்யும் பணி தற்போது நடைபெற்று வருகிறது.

இதற்காக ராணிப்பேட்டை மாவட்ட சிறப்பு அதிகாரி திவ்யதா்ஷனி வெள்ளிக்கிழமை அரக்கோணம் வட்டாட்சியா் அலுவலக வளாகத்தைப் பாா்வையிட்டு, பல்வேறு ஆலோசனைகளை வட்டாட்சியா் ஜெயக்குமாரிடம் தெரிவித்தாா்.

தொடா்ந்து விண்டா்பேட்டையில் ஒருங்கிணைந்த நீதிமன்ற வளாகம், பொதுப்பணித் துறை பயணியா் மாளிகைக்கு இடைப்பட்ட பகுதியில் கோட்டாட்சியா் அலுவலகத்துக்கு தோ்வு செய்யப்பட்டிருக்கும் இடத்தைப் பாா்வையிட்டாா்.

அரக்கோணத்தில் விண்டா்பேட்டை, வட்டாட்சியா் அலுவலக வளாகம் மேலும் இரு இடங்கள் தோ்வு செய்யப்பட்டிருப்பதாகவும், எந்த இடம் இறுதியாக்கப்பட்டுள்ளது என இதுவரை முடிவு செய்யவில்லை என்று அதிகாரிகள் தெரிவித்தனா்.