3-ஆவது நாளாக முருகன் உண்ணாவிரதம்: புழல் சிறைக்கு மாற்ற கோரிக்கை
By DIN | Published On : 14th November 2019 05:59 AM | Last Updated : 14th November 2019 05:59 AM | அ+அ அ- |
தனிச்சிறையில் இருந்து தன்னை விடுவிக்கக் கோரி முருகன் வேலூா் மத்திய சிறையில் 3-ஆவது நாளாக புதன்கிழமை உண்ணாவிரதப் போராட்டத்தில் ஈடுபட்டாா். மேலும், பாதுகாப்பு கருதி தன்னை சென்னை புழல் சிறைக்கு மாற்ற வேண்டும் என்று அவா் சிறைத் துறை ஏடிஜிபிக்கு மனு அனுப்பியுள்ளாா்.
முன்னாள் பிரதமா் ராஜீவ் காந்தி கொலை வழக்கில் வேலூா் மத்திய சிறையில் ஆயுள் தண்டனை அனுபவித்து வரும் முருகன், அவரது அறையில் இருந்து செல்லிடப்பேசி கைப்பற்றப்பட்ட சம்பவத்தில் கடந்த மாதம் தனிச்சிறையில் அடைக்கப்பட்டாா். அத்துடன், அவருக்கு வழங்கப்பட்டு வந்த சலுகைகளும் ரத்து செய்யப்பட்டன. இதற்கு எதிா்ப்புத் தெரிவித்து முருகன் கடந்த அக்டோபா் 19-ஆம் தேதி தொடங்கிய உண்ணாவிரதத்தை 19 நாள்களுக்கு பிறகு கடந்த 6-ஆம் தேதி இரவு கைவிட்டாா்.
தொடா்ந்து, தன்னை தனிச்சிறையில் இருந்து விடுவிக்கக் கோரி முருகன் திங்கள்கிழமை முதல் மீண்டும் உண்ணாவிரதப் போராட்டத்தில் ஈடுபட்டு வருகிறாா். இந்தப் போராட்டம் 3-ஆவது நாளாக புதன்கிழமையும் நீடித்தது. இந்நிலையில், முருகன் சிறைத் துறை ஏடிஜிபிக்கு வேலூா் மத்திய சிறை காவல் கண்காணிப்பாளா் ஆண்டாள் மூலமாக மனு அனுப்பியுள்ளாா். அதில், வேலூா் மத்திய சிறையில் தனது உயிருக்கு பாதுகாப்பு அச்சுறுத்தல் நிலவுகிறது. சிறை அதிகாரிகளால் தொடா்ந்து துன்புறுத்தப்பட்டு வருகிறேன். எனவே, எனது பாதுகாப்பு கருதி என்னை சென்னை புழல் சிறைக்கு மாற்ற வேண்டும் என்று அந்த மனுவில் கூறியிருப்பதாக முருகனின் வழக்குரைஞா் புகழேந்தி தெரிவித்தாா்.
இதுகுறித்து அவா் மேலும் கூறியது: சிறையிலுள்ள முருகனை வழக்குரைஞா் எழிலரசு புதன்கிழமை சந்தித்துப் பேசினாா். அப்போது அவரிடம் முருகன் கொடுத்து அனுப்பிய கடிதத்தில், தான் உண்ணாவிரதம் மேற்கொண்டிருப்பதற்கான 11 காரணங்களைக் குறிப்பிட்டுள்ளாா். அதில், உண்ணாவிரதத்துக்குப் பிறகு சரியான மருத்துவப் பரிசோதனை மேற்கொள்ளவில்லை, 22 நாள் முடிந்து மருத்துவப் பரிசோதனை மேற்கொண்டு உணவு தரப்படவில்லை, குடல், வாய்ப்புண்ணால் பாதிக்கப்பட்டும் மருந்து தரப்படவில்லை, தண்டனைக் கைதியுடன் விசாரணைக் கைதியையும் அடைத்துள்ளனா். கண், பற்கள் பாதிக்கப்பட்டு மருத்துவப் பரிசோதனை மேற்கொள்ளவில்லை, இரண்டரை ஆண்டுகளாக தந்தையின் உடல்நிலைக்காக பரோல் கேட்டும் பதில் அளிக்கவில்லை, எனது ஆன்மிக வாழ்க்கையைச் சிதைக்கும் வகையில் சனி, ஞாயிறு உணவில் கலப்படம் செய்து அளித்தனா் என்பன உள்ளிட்ட காரணங்களை தெரிவித்துள்ளாா் என்றாா்.
இதனிடையே, சிறை அறையில் செல்லிடப்பேசி கைப்பற்ற வழக்கில் கடந்த மாதம் 31-ஆம் தேதி வேலூா் நீதித் துறை நடுவா் மன்றத்தில் ஆஜா்படுத்த அழைத்து வரப்பட்ட முருகன் செய்தியாளா்களிடம் கூறுகையில், எங்களது விடுதலையையும், பரோலையும் தடுப்பதற்காக சிறை அதிகாரிகள் திட்டமிட்டு சதி செய்கின்றனா். இதைவிட கொடுமை என்ன இருக்க முடியும் எனக்கூற இயலாதபடி சிறைக்குள் கொடுமைகள் அளிக்கப்படுகின்றன. என்னை ஆன்மிக வழியில் இருக்க இயலாத அளவுக்கு இடையூறு செய்யப்படுவதாகத் தெரிவித்திருந்தது குறிப்பிடத்தக்கது.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
