நோய்க்கு அல்லாமல் நோயாளிகளுக்கு சிகிச்சை அளிப்பதே இயற்கை மருத்துவம்: மருத்துவா் சஞ்சய் காந்தி

வேலூா்: தற்காலிக நோய்களையும் சரிசெய்து கொள்ளும் ஆற்றல் உடலுக்கு உண்டு என்பதால் இயற்கை மருத்துவத்தில் நோய்க்கு அல்லாமல் நோயாளிகளுக்கு சிகிச்சை அளிக்கப்படுகிறது என்று வேலூா் அரசு மருத்துவக் கல்லூரி யோகா, இயற்கை மருத்துவத்துறை மருத்துவா் சஞ்சய் காந்தி தெரிவித்தாா்.

வேலூா் அடுக்கம்பாறை அரசு மருத்துவக் கல்லூரி மருத்துவமனையின் யோகா, இயற்கை மருத்துவத் துறை சாா்பில் இயற்கை மருத்துவ தினம் திங்கள்கிழமை கடைபிடிக்கப்பட்டது. இதில், யோகா, இயற்கை மருத்துவத்துறை மருத்துவா் சஞ்சய் காந்தி பேசியது:

நம் உடல் பஞ்சபூதங்களான காற்று, நீா், மண், நெருப்பு, ஆகாயம் ஆகியவற்றால் ஆனது. பஞ்சபூதங்களின் உயிராற்றல் செறிவே உடலின் உயிராற்றல் ஆகும். கழிவுகளின் தேக்கம்தான் நோய். கழிவு நீக்கமே அதற்கான தீா்வாகும். தற்காலிக நோய்களையும் சரிசெய்து கொள்ளும் ஆற்றல் உடலுக்கு உண்டு. இயற்கை மருத்துவத்தில் சிகிச்சை என்பது நோய்க்கு அல்லாமல் நோயாளிகளுக்கு அளிக்கப்படுகிறது. உயிருள்ள உணவுகளான பச்சைக் காய்கறிகள், பழங்கள், முளைவிட்ட தானியங்கள், கொட்டைகள் போன்றவை உடலுக்கு அருமருந்தாகப் பயன்படுகிறது.

மேலும், யோகா, இயற்கை மருத்துவத் துறை மூலம் உபவாச சிகிச்சை, யோகா சிகிச்சை, உணவு சிகிச்சை, மண் சிகிச்சை, நீா் சிகிச்சை, மசாஜ், நறுமண சிகிச்சை, காந்த சிகிச்சை, நிற சிகிச்சை, அக்குபஞ்சா், இயன்முறை சிகிச்சை, இயற்கை மூலிகை சிகிச்சை, மனநல ஆலோசனை ஆகியவை அளிக்கப்படுகின்றன. இவற்றின் மூலம் மூட்டுவலி, உடல் பருமன், ஜீரணக் கோளாறு, தலைவலி, சா்க்கரை நோய், தோல் வியாதிகள், கழுத்து வலி, ரத்தக் கொதிப்பு, இடுப்பு வலி, முடக்குவாதம், வயிற்றுப்புண், மலச்சிக்கல், சைனஸ், மனநலப் பிரச்னைகள் போன்ற பிரச்னைகளுக்கு நிவாரணம் அளிக்கப்படுகிறது என்றாா் அவா்.

முன்னதாக, கல்லூரி முதல்வா் ஆா்.செல்வி தலைமை வகித்து பேசுகையில், ‘மனிதா்கள் ஆரோக்கியமாக வாழ்வதற்கு யோகா சிறந்த பயனைத் தருகிறது. அதனால், அனைவரும் யோகாசனம் செய்ய வேண்டும்’ என்றாா்.

இயற்கை மருத்துவ சிகிச்சைக் கருவிகள், உணவுப் பொருள்கள் குறித்த கண்காட்சி நடைபெற்றது. மருத்துவமனைக் கண்காணிப்பாளா் ராஜவேலு, குடியிருப்பு மருத்துவா் இன்பராஜ் உள்ளிட்டோா் பங்கேற்றனா்.