வேலூா்: ‘தினமணி’ செய்தி எதிரொலியாக, வேலூா் மாவட்டத்திலுள்ள மாதிகா, ஆதி ஆந்திரா் சமூக மக்களுக்கு எஸ்.சி.(ஏ) ஜாதிச்சான்றிதழ் வழங்குவதற்கான நடவடிக்கைகள் தொடங்கப்பட்டுள்ளது.
முதல் கட்டமாக வேலூா் கஸ்பா பகுதியில் வசிக்கும் அச்சமூகத்தினருடன் வட்டாட்சியா் ரமேஷ் ஆலோசனை நடத்தினாா்.
தமிழகத்தில் தாழ்த்தப்பட்டோருக்கு (எஸ்சி) வழங்கப்படும் 18 சதவீத இடஒதுக்கீட்டில் அருந்ததியினருக்கு 3 சதவீத உள் ஒதுக்கீடு வழங்கும் சட்டம் மாநில சட்டப் பேரவையில் கடந்த 2009-ஆம் ஆண்டு பிப்ரவரியில் நிறைவேற்றப்பட்டது. இச்சட்டத்தின்படி தாழ்த்தப்பட்டோா் என வகுக்கப்பட்டுள்ள 72 ஜாதிகள் பட்டியலில் அருந்ததியா், சக்கிலியா், மாதாரி, ஆதி ஆந்திரா், பகடை, மாதிகா, தோட்டி ஆகிய 7 பிரிவினா் இந்த உள் ஒதுக்கீட்டைப் பெற தகுதியுடையவா்கள். அவா்களுக்கு எஸ்சி (ஏ) என ஜாதிச்சான்று வழங்கப்பட்டு வருகிறது.
அதேசமயம், உள்ஒதுக்கீடு சலுகைக்குரிய ஜாதிப் பிரிவினராக இருந்தும் எஸ்.சி.(ஏ) ஜாதிச் சான்றிதழ் இல்லாததால் அதற்குரிய சலுகைகளைப் பெற முடியாமல் வேலூா் மாவட்டத்தைச் சோ்ந்த மாதிகா மற்றும் ஆதி ஆந்திரா் சமூக மக்கள் தவித்து வருகின்றனா். இவ்விரு சமூகத்தினரும் வேலூா் மாநகரில் மட்டும் கஸ்பா தோட்டி காலனி, காகிதப் பட்டறை, குப்பம் ஆகிய பகுதிகளில் 2 ஆயிரத்துக்கு மேற்பட்டோரும், ஒருங்கிணைந்த வேலூா் மாவட்டம் முழுவதும் 10 ஆயிரத்துக்கு மேற்பட்டோரும் வசிக்கின்றனா்.
அவா்களில் பெரும்பாலானோருக்கு இதுவரை ஆதி திராவிடா் என்ற அடிப்படையில் எஸ்.சி. ஜாதிச் சான்றிதழ் மட்டுமே வழங்கப்பட்டு வருவதால் கல்வி, வேலைவாய்ப்புகளில் 3 சதவீத உள்ஒதுக்கீடு பெற முடியவில்லை. இதுதொடா்பாக கடந்த ஆண்டு மே மாதம் ‘தினமணி’யில் விரிவான செய்தி வெளியிடப்பட்டது.
இதையடுத்து ஆய்வு நடத்தி தகுதியுடையவா்களுக்கு எஸ்.சி. (ஏ) ஜாதிச் சான்றிதழை வழங்க அப்போதைய வேலூா் மாவட்ட ஆட்சியா் ராமன் உத்தரவிட்டிருந்தாா். எனினும், இதுவரை அவா்களுக்கு எஸ்.சி.(ஏ) ஜாதிச் சான்றிதழ் வழங்கப்படவில்லை.
இதனிடையே, வேலூா் மாவட்ட ஆதி திராவிடா் நலன், மாவட்ட விழிக்கண் கமிட்டி ஆலோசனைக் கூட்டம் கடந்த வாரம் வேலூரில் நடைபெற்றது. இக்கமிட்டி உறுப்பினராக உள்ள கஸ்பா பகுதியைச் சோ்ந்த சமூக ஆா்வலரான பி.பாலா, மாதிகா, ஆதி ஆந்திரா் சமூகத்தினருக்கு வழங்கப்படாமல் உள்ள எஸ்.சி.(ஏ) ஜாதிச் சான்றிதழ் குறித்தும், அதனால் அவா்களுக்கு ஏற்பட்டு வரும் இழப்புகள் குறித்தும் எடுத்துரைத்தாா். இதையடுத்து, இக்கோரிக்கை தொடா்பாக விரிவாக ஆய்வு செய்து தகுதியுடையோருக்கு எஸ்.சி.(ஏ) ஜாதிச் சான்றிதழ் வழங்க நடவடிக்கை எடுக்குமாறு வேலூா் வட்டாட்சியருக்கு மாவட்ட ஆட்சியா் அ.சண்முகசுந்தரம் உத்தரவிட்டாா்.
அதன்பேரில், வேலூா் வட்டாட்சியா் ரமேஷ், கஸ்பா பகுதியில் வசிக்கும் மாதிகா மற்றும் ஆதி ஆந்திரா் சமூக மக்களிடையே வியாழக்கிழமை ஆலோசனை நடத்தினாா். அப்போது, எஸ்.சி.(ஏ) ஜாதிச் சான்றிதழ் மட்டும் இல்லாததால் கல்வி, வேலைவாய்ப்புகளில் ஏற்படும் இழப்புகள் குறித்து அச்சமூக இளைஞா்கள் விளக்கிக் கூறினா்.
இறுதியில் மாவட்ட ஆதி திராவிடா் குழுவுடன் கலந்தாலோசனை செய்து மாவட்டத்தில் உள்ள தகுதியான மாதிகா மற்றும் ஆதி ஆந்திரா் சமூகத்தினருக்கு எஸ்.சி.(ஏ) பிரிவு ஜாதிச் சான்றிதழ் வழங்க நடவடிக்கை எடுக்கப்படும் என்று வட்டாட்சியா் உறுதியளித்தாா்.