ஒருங்கிணைந்த வேலூா் மாவட்டத்தில் 2 ஏக்கா் பரப்பளவில் சிறிய அளவிலான ஜவுளி பூங்கா அமைக்க திட்டமிடப்பட்டுள்ளது. இதுதொடா்பாக, மாவட்டத்திலுள்ள தனியாா் ஜவுளி உற்பத்தியாளா்கள், நெசவாளா் கூட்டுறவு சங்கங்களின் தலைவா்களின் கருத்துகள் கேட்டறியப்பட்டுள்ளன.
ஒருங்கிணைந்த வேலூா் மாவட்டத்தில் குடியாத்தம், அரக்கோணத்தில் லுங்கி, சேலை ரகங்கள் பெருமளவில் உற்பத்தி செய்யப்படுகின்றன. இப்பகுதியிலுள்ள ஜவுளி உற்பத்தி தொழிலை நம்பி ஆயிரக்கணக்கான மக்கள் நேரடியாகவும், மறைமுகமாகவும் பணி யாற்றி வருகின்றனா்.
இந்நிலையில், வேலைவாய்ப்பைப் பெருக்கிடும் வகையில் தமிழக கைத்தறி, துணிநூல் துறை சாா்பில் அனைத்து மாவட்டங்களிலும் ஜவுளி உற்பத்தியாளா்களைக் கொண்டு சிறிய அளவிலான ஜவுளி பூங்கா அமைக்க தமிழக அரசு உத்தரவிட்டுள்ளது. அதனடிப்படையில், வேலூா் மாவட்டத்திலும் 2 ஏக்கா் பரப்பளவில் இந்த ஜவுளி பூங்கா அமைக்க திட்டமிடப்பட்டுள்ளது.
இந்த ஜவுளி பூங்கா அமைப்பது தொடா்பாக மாவட்டத்திலுள்ள ஜவுளி உற்பத்தியாளா்களுடனான முதல்கட்ட ஆலோசனைக் கூட்டம் வேலூா் மாவட்ட ஆட்சியா் அலுவலகத்தில் வியாழக்கிழமை நடைபெற்றது.
மாவட்ட ஆட்சியா் அ.சண்முகசுந்தரம் தலைமையில் நடைபெற்ற இக்கூட்டத்தில், மாவட்ட கைத்தறி, துணி நூல் துறை உதவி இயக்குநா் கி.மோகன் பங்கேற்று ஜவுளி உற்பத்தியாளா்களின் கருத்துகளை கேட்டறிந்தாா்.
அப்போது, ஜவுளி உற்பத்தியாளா்கள் தரப்பில் நிலம் வாங்கி ஜவுளி பூங்கா அமைக்க போதிய நிதி ஆதாரம் இல்லை என்றும், அரசு சாா்பில் ஜவுளி பூங்கா அமைக்கப்படும் பட்சத்தில் அதில் தொழில் தொடங்கி ஜவுளி உற்பத்தி செய்ய தயாராக உள்ளோம் என்றும் தெரிவிக்கப்பட்டது.
இக்கருத்துகளை அரசுக்கு அனுப்பி அடுத்த கட்ட நடவடிக்கை எடுக்கப்படும் என்று மாவட்ட கைத்தறி, துணி நூல் துறை உதவி இயக்குநா் தெரிவித்தாா்.
தமிழக ஊரக வளா்ச்சி முகமை அலுவலா் தமிழ்மாறன், நெசவாளா் கூட்டுறவு சங்கங்களின் தலைவா்கள், தனியாா் ஜவுளி உற்பத்தியாளா்கள் பங்கேற்றனா்.