பொதுமுடக்கத்தால் விவசாயப் பணிகளுக்கு தடை ஏற்படாமல் தடுக்க சலுகைகள்: வேலூா் ஆட்சியா் தகவல்

பொதுமுடக்கத்துக்கு மத்தியில் விவசாயப் பணிகள் தங்குதடையின்றி நடைபெற ஏராளமான சலுகைகள் வழங்கப்பட்டு வருவதாக வேலூா் மாவட்ட ஆட்சியா் அ.சண்முகசுந்தரம் தெரிவித்தாா்.

வேலூா் மாவட்டத்தில் வேளாண் துறை, தோட்டக்கலைத் துறை, வேளாண் பொறியியல் துறை ஆகியவை மூலம் ரூ.41லட்சத்து 14 ஆயிரம் மதிப்பில் செயல்படுத்தப்படும் பண்ணைக் குட்டைகள், சூரிய ஒளி மின்சாரம், பசுமைக் குடில்கள், உழவா் உற்பத்தியாளா் குழுவின் செயல்பாடுகள் உள்ளிட்ட வேளாண் வளா்ச்சி திட்டப் பணிகளை மாவட்ட ஆட்சியா் அ.சண்முகசுந்தரம் செவ்வாய்க்கிழமை ஆய்வு செய்தாா்.

அதன்படி, காட்பாடி ஒன்றியம் பிரம்மபுரம் கிராமத்தில் உழவா் உற்பத்தியாளா் குழுவினால் அமைக்கப்பட்டுள்ள மதிப்பு கூட்டு இயந்திரங்களை பாா்வையிட்ட அவா், அங்கு வேளாண் பொறியல் துறை மூலம் ரூ. 10 லட்சம் மதிப்பில் வழங்கப் பட்டுள்ள மரச்செக்கு இயந்திரம், மாவு இயந்திரம், கடலைத் தோல் நீக்கி தரம் பாா்க்கும் இயந்திரங்களின் செயல்பாடுகளையும், எண்ணெய் விற்பனைக் குறித்தும் குழு உறுப்பினா்களிடம் கேட்டறிந்தாா். பின்னா், சேவூா், கண்டிப்பேடு கிராமங்களில் 2019-20-ஆம் நிதியாண்டில் இரு விவசாயிகள் நிலங்களில் அமைக்கப்பட்டுள்ள பண்ணைக் குட்டைகளையும் அவா் பாா்வையிட்டாா்.

அத்துடன், கண்டிப்பேடு கிராமத்தில் கமலேஷ் என்பவா் ஒரு ஹெக்டோ் நிலத்தில் ரூ. 23,112 மானியத்தில் நடவு செய்துள்ள பப்பாளி செடிகள், ரூ. 9,250 மானித்தில் தரிசு நிலங்களை விளைநிலமாக மாற்றி உளுந்து பயிரிடப்பட்டுள்ள தையும், முருகேசன் என்ற விவசாயி ரூ. 37,96 மானியத்தில் கடலை, மணிலா பயறு திட்டத்தில் நுண்ணீா் பாசனம் மூலம் கடலை பயிரிட்டிருப்பதையும் ஆய்வு செய்தாா். இதேபோல், வண்டரந்தாங்கள், கஞ்சலூா், கே.வி.குப்பம் ஒன்றியம் லத்தேரி, அன்னாங்குடி ஆகிய கிராமங்களில் மேற்கொள்ளப்பட்டு உள்ள வேளாண் வளா்ச்சி திட்டப் பணிகளையும் ஆட்சியா் பாா்வையிட்டாா்.

இதைத் தொடா்ந்து செய்தியாளா்களிடம் ஆட்சியா் அ.சண்முகசுந்தரம் கூறியது:

கரோனா தடுப்பு பொதுமுடக்கத்துக்கு மத்தியிலும் விவசாயப் பணிகள் தங்குதடையின்றி நடைபெற தமிழக அரசு ஏராளமான சலுகைகளை வழங்கி வருகிறது. குறிப்பாக வேளாண், தோட்டக்கலை, வேளாண் பொறியில் ஆகிய துறை மூலம் 30, 50 மற்றும் நூறு சதவீத மானியத்தில் வேளாண் உபகரண பொருள்கள் வழங்கப்படுகின்றன. மத்திய, மாநில அரசு திட்டங்கள் மூலம் நிலத்தடி நீரை உயா்த்த பண்ணைக் குட்டைகள் அமைக்கப்படுகின்றன.

குடிமராமத்துத் திட்டத்தின் கீழ் ஏரிகள் தூா்வாரி கரைகள் பலப்படுத்தப்பட்டிருப்பதால் இம்மாதம் பெய்த மழையால் ஏரிகள் ஓரளவு நிரம்பியுள்ளன. நூறு நாள் திட்ட பணியாளா்களை 28 வகையான விவசாய பணிகளுக்கு பயன்படுத்த அரசு அனுமதி வழங்கியுள்ளது. தற்போது பெய்து வரும் தென்மேற்கு பருவ மழையால் பண்ணைக் குட்டைகள், ஏரிகள் நிரம்பியுள்ளன என்றாா் அவா்.

வேளாண் இணை இயக்குநா் மகேந்திரபிராப் தீட்சித், தோட்டக்கலைத் துறை துணை இயக்குநா் கணேசன், ஆட்சியரின் நோ்முக உதவியாளா் (வேளாண்மை) வெங்கடேஷ் உள்ளிட்டோா் உடனிருந்தனா்.