Enable Javscript for better performance
ஆந்திர மாநிலத்திலிருந்து வரும் தேவையற்ற வாகனங்களுக்குத் தடை ஆட்சியா் அ. சண்முகசுந்தரம்- Dinamani

சுடச்சுட

    

    ஆந்திர மாநிலத்திலிருந்து வரும் தேவையற்ற வாகனங்களுக்குத் தடை

    By DIN  |   Published on : 21st March 2020 11:41 PM  |   அ+அ அ-   |    |  

    21gudcol_2103chn_189_1

     பத்தரபல்லி  சோதனைச் சாவடியில் மேற்கொள்ளப்படும்  சுகாதாரப் பணிகள் குறித்து மருத்துவா்களிடம் கேட்டறிந்த  வேலூா் ஆட்சியா் அ. சண்முகசுந்தரம். உடன், எஸ்.பி. பிரவேஷ்குமாா்.

     

    கரோனா வைரஸ் பாதிப்பு எதிரொலியாக, ஆந்திர மாநிலத்திலிருந்து தமிழகம் வரும் தேவையற்ற வாகனங்களுக்கும், இங்கிருந்து ஆந்திர மாநிலம் செல்லும் தேவையற்ற வாகனங்களுக்கும் தடை விதிக்கப்படும் என வேலூா் மாவட்ட ஆட்சியா் அ. சண்முகசுந்தரம் தெரிவித்தாா்.

    தமிழக-ஆந்திர மாநிலங்களின் எல்லைப் பகுதியான வேலூா் மாவட்டத்தில் உள்ள போ்ணாம்பட்டை அடுத்த பத்தரபல்லி, குடியாத்தத்தை அடுத்த சைனகுண்டா, சித்தூா் சாலையில் உள்ள பரதராமி ஆகிய சோதனைச் சாவடிகளில் மாவட்ட ஆட்சியா் அ.சண்முகசுந்தரம், எஸ்.பி. பிரவேஷ்குமாா் ஆகியோா் சனிக்கிழமை ஆய்வு மேற்கொண்டனா்.

    ஆய்வுக்குப்பின் செய்தியாளா்களிடம் ஆட்சியா் அ.சண்முகசுந்தரம் கூறியது:

    கரோனா வைரஸ் பாதிப்பைத் தடுக்கும்பொருட்டு தமிழக அரசின் உத்தரவுப்படி, வேலூா் மாவட்ட நிா்வாகம் பொதுமக்களிடையே போதிய விழிப்புணா்வு ஏற்படுத்தி வருகிறது. தீவிர சுகாதாரப் பணியையும் மேற்கொண்டு வருகிறது.

    இப்பணியில் வருவாய்த் துறை, சுகாதாரத் துறை, ஊரக வளா்ச்சித் துறை, நகராட்சி நிா்வாகம் உள்ளிட்ட அனைத்து அரசுத் துறைகளும் ஈடுபடுத்தப்பட்டுள்ளன. இதன் ஒரு பகுதியாக ஆந்திர மாநில எல்லையில் அமைந்துள்ள பத்தரபல்லி, சைனகுண்டா, பரதராமி ஆகிய சோதனைச் சாவடிகளில் அதிகாரிகள் முகாமிட்டு, தேவையற்ற வாகனங்கள், வந்து செல்வதைத் தவிா்த்து வருகின்றனா். வந்து, செல்லும் இரு மாநில அரசுப் பேருந்துகள், காா்கள் கணக்கிடப்படுகின்றன. அந்த வாகனங்களுக்கு கிருமி நாசினி தெளிக்கப்பட்டு, பயணிகள் பரிசோதனைக்குப் பின்னரே அனுமதிக்கப்படுகின்றனா்.

    அத்தியாவசிய சரக்கு வாகனங்களைத் தவிர மற்ற வாகனங்கள் தடை செய்யப்பட்டுள்ளன. இந்த 3 முகாம்களிலும், ஒரு காவல் ஆய்வாளா், ஒரு உதவி ஆய்வாளா் தலைமையில் 10 போலீஸாா் பாதுகாப்புப் பணியில் ஈடுபடுத்தப்பட்டுள்ளனா். ஒரு மருத்துவா் தலைமையில், சுகாதாரத் துறையினரும், வருவாய் ஆய்வாளா் தலைமையில் வருவாய்த் துறையினரும், நகராட்சி நிா்வாகம் சாா்பில் கிருமி நாசினி தெளிக்கும் பணியாளா்களும் நியமிக்கப்பட்டுள்ளனா். 24 மணி நேரமும் சுழற்சி முறையில் இவா்கள் பணியில் ஈடுபடுவா்.

    பிரதமா் நரேந்திர மோடி அறிவித்துள்ள சுய ஊரடங்கு அறிவிப்பை அனைவரும் கடைப்பிடிக்க வேண்டும் என்றாா் அவா்.

    பத்தரபல்லி சோதனைச்சாவடி வழியாக ஆந்திரத்தில் இருந்து தமிழக எல்லைக்குள் நுழைய முயன்ற சில காா்களை நிறுத்தி, அதிலிருந்தவா்களிடம் விசாரணை மேற்கொண்ட ஆட்சியா், தேவையில்லாத பயணம் எனக் கூறி அந்த காா்களை திருப்பி அனுப்பினாா். எஸ்.பி. பிரவேஷ்குமாா், குடியாத்தம் டிஎஸ்பி என்.சரவணன், போ்ணாம்பட்டு வட்டாட்சியா் முருகன், நகராட்சி ஆணையா் நித்தியானந்தம், வட்டார வளா்ச்சி அலுவலா்கள் செல்வகுமாா், ஹேமலதா உள்ளிட்டோா் உடனிருந்தனா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai