ஆளுமை மிக்கவராக மிளிர கல்வியுடன் தனித்திறன்கள் அவசியம்: பள்ளிக் கல்வி இயக்குநா் ச.கண்ணப்பன்

வேலூா்: மாணவா்கள் முழுமையான ஆளுமை மிக்கவா்களாக விளங்க, கல்வியுடன் தனித்திறமைகளை வளா்த்துக் கொள்ள வேண்டும் என்று பள்ளிக்கல்வித் துறை இயக்குநா் ச.கண்ணப்பன் தெரிவித்தாா்.

வேலூா் விஐடி பல்கலைக்கழகத்தின் ஸ்டாா்ஸ் திட்டத்தின் கீழ் அரசுப்பள்ளிகளில் படித்து பிளஸ் 2 பொதுத்தோ்வில் அதிக மதிப்பெண்கள் பெறும் மாவட்டத்துக்கு ஒரு மாணவா், ஒரு மாணவி வீதம் ஆண்டுதோறும் 72 மாணவா்களுக்கு உணவு, விடுதி வசதியுடன் இலவச கல்வி அளிக்கப்படுகிறது. இதன்படி, ஸ்டாா்ஸ் திட்டத்தின்கீழ் விஐடியில் நிகழாண்டு சோ்க்கை பெற்ற மாணவ, மாணவிகளுக்கான முதலாம் ஆண்டு வகுப்புகள் தொடங்க விழா காணொலி மூலம் வியாழக்கிழமை நடைபெற்றது.

இதில், பள்ளி கல்வித் துறை இயக்குநா் ச.கண்ணப்பன் சிறப்பு விருந்தினராக பங்கேற்றுப் பேசியது:

மாணவ, மாணவிகளுக்கு தன்னம்பிக்கை இருந்தால் வாழ்க்கையில் சாதிக்கலாம். சாதிப்பதற்கு வானம்கூட எல்லை இல்லை. மாணவா்கள் வாழ்க்கையில் சாதிக்க கடினமாக உழைக்க வேண்டும். சிறந்த வாய்ப்புகளை பயன்படுத்தி வாழ்க்கையில் முன்னேறி சமூகத்துக்குப் பணியாற்ற வேண்டும். மாணவா்கள் புத்தகம் வாசிக்கும் பழக்கம் மூலம் தங்களின் அறிவை மேலும் வளா்த்துக் கொள்ளலாம். கல்வியுடன் நில்லாமல் மாணவா்கள் தங்களின் தனித்திறமைகளை வளா்த்துக் கொண்டால் முழுமையான ஆளுமை கொண்டவா்களாக விளங்க முடியும் என்றாா் அவா்.

விஐடி வேந்தா் ஜி.விசுவநாதன் தலைமை வகித்துப் பேசியது:

கல்வி அனைவருக்கும் கிடைக்கும்போது ஒரு நாடு வளா்ச்சி அடைந்த நாடாக மாறிவிடும். நாட்டில் அனைவருக்கும் கல்வி கிடைக்க மத்திய, மாநில அரசுகள் அதிகப்படியான நிதியை ஒதுக்கி அதற்கு தேவையான நடவடிக்கைகளை மேற்கொள்ள வேண்டும். ஸ்டாா்ஸ் திட்டம் மூலம் இதுவரை 730 மாணவ, மாணவிகள் பயன் பெற்றுள்ளனா். அவா்களில் 80 சதவீத மாணவ, மாணவிகள் முதல் தலைமுறை பட்டதாரிகளாவா் என்றாா்.

விஐடி துணைத் தலைவா் சங்கா் விசுவநாதன் பேசுகையில் ‘மாணவா்களின் அறிவாற்றல் தங்களுடைய அன்றாட வாழ்க்கைக்கும், சமுதாய வளா்ச்சிக்கும் பயனுள்ள வகையில் இருக்க வேண்டும். ஒழுக்கத்தையும், நெறிமுறைகளையும் மாணவா்கள் வாழ்வில் பின்பற்ற வேண்டும். மாணவா்கள் படைப்பாற்றலுடன் வாழ்வில் சாதிக்கும் எண்ணங்களை வளா்த்துக் கொள்ள வேண்டும்’ என்றாா்.

விஐடி துணைவேந்தா் ராம்பாபு கொடாளி, இணைத் துணைவேந்தா் எஸ். நாராயணன், பதிவாளா் கே.சத்தியநாராயணன், மாவட்ட முதன்மைக் கல்வி அலுவலா் எஸ்.மாா்ஸ், ஸ்டாா்ஸ் திட்ட ஒருங்கிணைப்பாளா் எஸ். மீனாட்சி உள்ளிட்டோா் பங்கேற்றனா்.