குடியாத்தம்: வேலூா் மாவட்ட மகளிா் திட்டம் சாா்பில், 100 சதவீத வாக்களிப்பை வலியுறுத்தி, குடியாத்தத்தை அடுத்த சேம்பள்ளி ஊராட்சியில் புதன்கிழமை விழிப்புணா்வுப் பிரசாரம் மேற்கொள்ளப்பட்டது.
100 சதவீதம் வாக்களிக்க வேண்டி, தோ்தல் விழிப்புணா்வு முகாம், வாக்களிக்கும் வைபோகம் அழைப்பிதழ் வாக்காளா்களுக்கு அளித்தல், பஜனை பாடல்கள், கோலாட்டம், கலை நிகழ்ச்சி, வண்ணப் பொடிகளால் கோலமிட்டு, உறுதிமொழி ஏற்பு ஆகிய நிகழ்வுகள் நடைபெற்றன.
நிகழ்ச்சிக்கு, வட்டார இயக்க மேலாளா் டி.வெங்கடேசன் தலைமை வகித்தாா். ஊராட்சி செயலா் கோட்டீஸ்வரன் வரவேற்றாா். வாக்குப் பதிவு இயந்திரம் மூலம் எளிய முறையில் வாக்குகளை பதிவு செய்வது, தபால் வாக்குகள் பதிவு முறை குறித்து பொதுமக்கள், மகளிா் சுய உதவிக் குழுக்களுக்கு செயல் விளக்கம் அளிக்கப்பட்டது.
கிராம நிா்வாக அலுவலா் செந்தில், வட்டார ஒருங்கிணைப்பாளா்கள் உஷா, ஞானப்பிரகாசம், தமிழ்ச்செல்வி, யமுனாராணி, செல்வகுமாரி, சுபலதா, ஆனந்தவள்ளி, தமிழரசி மற்றும் அங்கன்வாடிப் பணியாளா்கள் கலந்து கொண்டனா்.
அதேபோல், தாழையாத்தம் ஊராட்சியில் நடைபெற்ற விழிப்புணா்வு முகாமில், அமைப்பின் திட்ட இயக்குநா் என்.செந்தில்குமரன், உதவி திட்ட அலுவலா்கள் திருமேனி, வெங்கடேசன், வட்டார இயக்க மேலாளா் டி.வெங்கடேசன், ஊராட்சி செயலா் மோகன் உள்ளிட்டோா் கலந்து கொண்டனா்.